Zekine Turkeri BERRIAko kolaboratzaileak aurreratu bezala —bideoan aurkezlearen atzean, urdinez jantzita—, Turkiak itxi egin du IMC telebista. Recep Tayyip Erdogan presidentearekin kritiko den kate bat da, eta Hayatin Sesi beste telebista kritiko baten itxieraz informatzen ari zenean sartu da Polizia estudioetan. Turkerik berak espero zuen albistea irailaren 25ean BERRIAn argitaratu zen elkarrizketan zioenez: "Esnatzean egiten dudan aurreneko gauza da telebistako atarian sartu, ikusteko zabalik jarraitzen ote duen".
TV channel IMC is taken off air as journalists bid farewell live on air. Unbelievable. pic.twitter.com/2Sz97h5Gc4
— Mahir Zeynalov (@MahirZeynalov) 2016(e)ko urriak 4
Bi telebista horiek gertutik jarraitzen dute Kurdistanen gertatzen dena, eta pasa den ostegunean "propaganda terrorista" zabaltzea leporatuta ixteko agindu zuten, beste hamar kate ixtearekin batera. Turksat satelite bidezko operadoreak otsailean eten zuen IMCrekin zuen kontratua segurtasun nazionala aitzakia hartuz. IMCk, ordea, emisioekin jarraitu zuen Hotbird satelitearen eta Internet bidez. "Zabalik dagoen komunikabide liberal eta aurrerakoi bakanetakoa da", zioen Turkerik.
Hamabi telebista kate horien itxiera uztailaren 20an ezarri zen larrialdi egoeraren babesesan egin du Erdoganek. Estatu kolpe saiakera izan zenetik ehun kazetari baino gehiago atxilotu dituzte, 775i prentsa akreditazioa kendu diete eta 2.300ek lana galdu dute, Turkiako prentsa elkarteen arabera. Turkerik BERRIAn salatu zuenez, Turkiako presidentea estatu kolpe saiakeraren ostean kaudillo baten moduan jokatzen ari da: "Tentsioa eta amorrua metatzen ari da. Turkia faxista batean bizi gara".
