2016an ez, baina Mayk "oso posibletzat" jo du 2017ko urtarril edo otsailerako aktibatzea Europako Batasuneko Itunen 50. artikulua, konfederaziotik irteteko negoziazioei bide ematen diena: "Egoera objektiboa da gure kide britainiarrek denbora gehiago behar dutela negoziazioetarako prestatzeko".
Tuskek azaldu du 27ak "ongi prestatuta" daudela elkarrizketak, behar izanez gero, "bihar bertan" abiatzeko. Edonola, Tuskek argitu du negoziazio horietan "27en interesak" defendatuko dituztela: "Ez dugu ezer Erresuma Batuaren aurka, baina gure prozedurak babestu behar ditugu Europako elkarte gisa ditugun interesak babesteko".
Gaur hasi dira Bratislavan Europako Batasuneko kideen goi bilera egiten, hain zuzen batasun horren etorkizunaz hitz egiteko. Erresuma Batua ez da bertan izan. Goi bileran, eztabaidagai izan dituzte datozen hilabeteetan Europako Batasunak Brexit-aren auzian, migrazioan, segurtasunean eta ekonomian eman beharreko pausoak. "Egoera kritiko batean gaude. Hobetu dezakegula erakutsi behar dugu", adierazi du Angela Merkel Alemaniako kantzilerrak.
