Uholdeek harrapatuta daude 300.000 lagun Mexikoko Tabasco estatuan

Uholde handiak ari dira gertatzen Mexiko hegoaldeko Tabasco estatuan: 300.000 lagun inguru beren etxeetan harrapatuta daude, eta gutxi gorabehera milioi bat herritar dira eurite handien ondorioak jasaten ari direnak. "Gure uzten %100 galdu dugu, eta estatuaren %70 urpean dago. New Orleansen bezala gaude", azaldu du Andres Granier Tabascoko gobernadoreak.

Felipe Calderon Mexikoko presidenteak ere larritasunez betetako mezua zabaldu du bart telebista bidez: "Egoera izugarri larria da", azpimarratu du, eta Tabascora laguntza bidaltzeko ura, elikagaiak, oinarrizko ondasunak eta dirua eman dezatela galdegin die.

Orain arte, uholdeek heriotza bat eragin dutela agertu dute iturri ofizialek, baina gune asko bakartuta daudenez, ezinezkoa da hango berri jasotzea eta zenbaketa zehatza egitea.