Ukrainako Hizkuntza Legeak protestak eragin ditu Krimean

Krimeako Parlamentuak atzo saio berezi bat egin zuen, Ukrainako Hizkuntza Lege berria indarrean jartzeko hartu beharreko neurriak eztabaidatzeko. Tokiko erakundeetan eskualde bakoitzean dauden hizkuntzak erabiltzeko eskubidea onartzen du legeak. Hizkuntza gutxituak erabiltzeko, baina, gutxienez eskualdeko biztanleen %10ek hitz egin behar dute hizkuntza hori. Legeak eztabaida gogorra piztu du gizartean, eta Krimean,besteak beste, protestak egin dituzte azken egunotan. Kexu dira, legeak errusierari mesede egiten diola eta. Oposizioak legeari aurkeztutako 2.000 zuzenketa baino gehiago kontuan hartu ez izana aurpegiratu diote Ukrainako Gobernuari.