Ukraina eta Errusiaren arteko gatazka izango dute gaur hizpide munduko zazpi herrialde aberatsenetako buruek. Hain zuzen, Frantziako presidente François Hollandek aurrerapausotzat jo du bi herrialdeetako gobernuburuak elkarrekin izatea bihar Normandiako lehorreratzearen 70. urteurreneko ekitaldietan.
Dena den, Errusiako presidente Vladimir Putinek ez du parte hartuko G7koen batzar orokorrean —Ukrainako krisia dela-eta taldetik kanporatu zuten—; bai, ordea, binakako bileretan. Besteak beste, Hollanderekin bilduko da Putin.
Izango dituzte, hala ere, bestelako eztabaidagaiak biltzarrean. Horietako bat izango da nazioarteko ekonomia eta merkataritza. Besteak beste, zerga saihestearen aurkako hitzarmen bat adostuko dutela iragarri dute iturri ofizialek. Mahai gainean izango dituzte Errusiako gasaren menpekotasuna amaitzeko neurriak ere.
