Turkiatik Greziara ontzi pneumatiko batean zetorren hamabi hilabeteko haur bat hil da bart Lesboseko kostaldean. Beste 56 iheslarirekin batera zihoan. Kostazainek 200 errefuxiatutik gora erreskatatu dituzte orotara. Aste honetan 7.000 etorkin baino gehiago iritsi dira Greziara.
Irailaren hasieran munduari itzulia eman zion Turkiako Bodrum hondartzan hilotz agertu zen Aylan 3 urteko iheslariaren irudiak. Harrezkero, haur gehiago ito dira Mediterraneoko uretan Europa erdiesteko ahaleginean.
Urtarriletik 350.000 errefuxiatutik gora heldu dira Europara itsasoz. Haiekin batera abiatutako beste 2.600 pertsona, aldiz, bidean geratu dira. Nazio Batuen Erakundeak ohartarazia du II. Mundu Gerraz geroztikako giza krisi larriena dela egungoa, eta gogorarazi du Sirian gatazkak irauten duen bitartean siriarrek asilo eskubidea dutela eta nazioarteak lagundu beharko lituzkeela.
