Ezinezkoa du Podemosek Mariano Rajoy kargutik kentzeko beharko lituzkeen 176 botoak lortzea. Horiek hala, gobernuburua kargugabetzeko bainoago hautesleen iritzia aldarazteko helburuarekin aurkeztutako zentsura mozioa da gaurkoa. Ez da izango ahaleginak egin ez dituztelako, baina oraingoz, gehienez ere, aldeko 82 boto aurreikusten dituzte —Unidos Podemosenak, Compromisenak, ERCrenak eta EH Bildurenak—.
Irene Montero izan da hitza hartzen lehena, mozioa azaltzeko. Ordu eta erdi inguru aritu da. Ondoren hitz egin du Pablo Iglesias alderdiburuak, eta hura beste bi ordu eta erdiz aritu da. Biek ala biek ustelkeria kasuak izan dituzte PPren kontra egiteko gai nagusi.
Mozioa aurkezteko Podemosen arrazoi nagusia izan dira PPren aurka zabaldutako ustelkeria auziak. Horiek zerrendatuz hasi du bere hitzaldia Monterok berak ere: "Gaur Espainiaren alde egin dezaketen hoberena litzateke alde egitea eta lapurtutako guztia estatuko diru kutxetara itzultzea". Bide beretik, ustelkeria "gobernatzeko modu" bilakatu izana leporatu dio Rajoyri.
Bozketa, bihar
Eztabaidak luze jo du; izan ere, Podemosekoen hitzaldien ostean, Rajoyk berak hartu du hitza. Ondoren alderdietako ordezkarien txanda izan da. Eztabaida amaitutakoan bozkatuko dute mozioa, bihar.
