Mariano Rajoy Espainiako Gobernuko presidenteak jakinarazi duenez, Kongresuan agerraldi bat prestatzeko eskatu dio Jesus Posada parlamentuko presidenteari. Ez du egunik zehaztu, baina adierazi du "uztail amaieran edo abuztu hasieran" egingo duela agerraldi hori.
Errumaniako lehen ministro Victor Pontari harrera egin dio Rajoyk, eta ondoren agertu da hedabideen aurrean. Adierazi duenez, uste du "une egokia" dela "egoera zein den azaltzeko, zalantzak argitzeko eta herritarrei kezka eragiten dien gaiez azalpenak emateko".
Luis Barcenas PPko diruzain ohiak alderdiko hainbat karguduni —tartean, Rajoyri berari— ustez emandako gainsoldaten inguruan hitz egingo du, beraz. Bere "bertsioa" emango duela esan du. Azaldu duenez, Kongresuari dagokio "subiranotasun nazionala" eta, beraz, han hitz egingo du "herritarrei kezka eragiten dien gaiez".
Konstituzionaleko presidentea
Iragan astean argitaratu zuen El País egunkariak Auzitegi Konstituzionaleko presidente Francisco Perez de los Cobos PPko kide zela epaitegiko buru izendatu zutenean. Hori etikoa den galdetuta, Rajoyk erantzun du: "Kasu honetan, gauzak ongi egin dira. Auzitegi Konstituzionaleko presidentea aho batez izendatu zuten".
Halaber, esan du agerraldia egiteko erabakian ez duela eragin PSOEk zentsura mozio bat aurkezteko aukerak.
