Uztailaren 21eko ustezko lau ekintzaileak atxilotu dituela dio Erresuma Batuko Poliziak

Hilaren 21ean Londresko atentatuetanparte hartu zuten ustezko bi erasotzaile atxilotu ditu Poliziak, arratsaldeko lehen orduan. Ustezko ekintzaileetako bat Notting Hillen, Londres mendebaldean atzeman dute, eta bigarrena, berriz, Hackney auzoan, Londres ekialdean. Hirugarren bat, Osman Hussein somaliarra, Erroman atzeman du Poliziak, Italiako Barne ministro Giuseppe Pisanuk esan duenez. Uztailaren 21ean Londresen izandako atentauetan parte hartu zuten ustezko erasotzaileetako bat, Jassin Hassan Omar somaliarra, astearen hasieratik atxilotuta eta identifikatuta dauka Londresko Poliziak. Gaurko atxiloketarekin, lau erasotzaileak bere esku izango lituzke Poliziak. Iragan 21ean, erasotzaileak Londresko hiru metro geltokitan, eta autobus batean saiatu ziren atentatuak burutzen. Hala ere, lehergailu sistemak huts egin ziela uste du Poliziak, eta horregatik, eztandak nahi zutena baino arinagoak izan zirela.

Bestetik, Londresko Liverpool Street tren geltokian bi emakume atxilotu ditu Poliziak, eta hartarako geltokia hustu dute. Bi emakumeak tren geltokian zeuden, eta kaleko jantzitako poliziek atxilotu egin dituzte. Antza denez, emakumeetako bat, aireportura joateko trena hartzeko iladan zegoen.