Orotara 212.672 pertsona atxilotu zituzten AEBetako segurtasun indarrek uztailean, eta horietatik 95.788 berehala kanporatu zituzten 42. Titulua baliatuta, zeinak ahalbidetzen duen migratzaileak kanporatzea «osasun larrialdia» argudio gisa erabilita. Beste 116.884 kanporatu zituzten, araudiaren 8. puntuaren arabera, asiloa eskatzeko baldintzak betetzen ez zituztelako. Datuok AEBetako Segurtasun Nazionalerako arduradun Alejandro Mayorkasek zabaldu zituen, atzo mugara egindako bisitan.
Osasun arrazoiak medio muga paperik gabe igarotzen duten herritarrak kanporatzea ahalbidetzen duen neurria Donald Trumpek jarri zuen indarrean aurreko legealdian. Joe Biden presidenteak eutsi egin dio neurriari, pandemia oinarri gisa hartuta, baina herrialdean bakarrik sartzen diren adingabeekin salbuespena eginez. Neurriak, hala ere, kritika sorta eragin du, batez ere aste honetan Etxe Zuriak berak onartu duenetik hegoaldeko mugatik sartzen diren migratzaileak Mexiko erdira eramaten hasi direla, muga berriz igarotzen saia ez daitezen. Izan ere, 42. Titulua baliatuta kanporatutako herritarrek ez dute, berez, lege oztoporik nahi adina aldiz AEBetan sartzen saiatzeko.
ACHR Giza Eskubideen Batzorde Interamerikarrak kezka agertu du AEBetako Gobernuaren jarrerarekin, eta ohartarazi politiko horiek oztopatu egiten dutela asiloa eskatu ahal izatea bera. «Mexiko hegoaldera eraman dituzte hainbat asilo eskatzaile, eta haietako batzuk handik Guatemalako mugara lekualdatu dituzte. Halakoek ezinezko egiten dute, asiloa eskatzeko eskubidea bera ez ezik, babesa behar duten pertsonak identifikatzea ere», kritikatu du erakundeak idatzi batean. Izan ere, arauak urratu egiten du pertsona arriskuan egon litekeen herrialdera ez itzularazteko printzipioa. Hala, erakundeak eskatu dio Washingtoni eten ditzala osasun larrialdia aitzakia gisa hartuta egindako kanporatzeak, eta bete ditzala pertsonen babesa helburu duten printzipioak.
Batzordearen eskariari erantzunez, Mayorkasek aurreratu du asiloa Internet bidez eskatu ahal izateko baliabideak jarriko dituztela abian, baina zehaztu gabe eskatzaileek zer-nolako baldintzak bete beharko dituzten horretarako. Programa hori jarri zuten indarrean aurreko legealdian ere, baina eskatzaileek denbora luzea egin behar izaten zuten zain mugaren Mexikoko aldean, erantzuna jaso arte, urtebete eta urte eta erdi artean, batez beste.
Auzitara
ACLU Ameriketako Askatasun Zibilen Batasunak hainbat bilera egin ditu azken asteetan Bidenen administrazioarekin, bertan behera utz dezaten 42. Titulua deritzona, baina alferrik. Hori dela-eta auzitara joko duela iragarri du. Auzitegiek salaketa tramiterako onartuko balute, eten egingo lirateke berehalako kanporatzeak. «Bidenen gobernuak ez digu auzitara jotzea beste aukerarik utzi. Badira zazpi hilabete 42. Titulua indarrean dela. Gure irtenbide bakarra dela uste dugu», salatu du Lee Gelernek, ACLUko abokatuetako batek.
