Aurreko egunetan ez bezala, gaur, Pinic per la Republica eta ANCk deitutako protestak Via Laietanan bildu dira, Espainiako Poliziak han duen egoitzan. Gaurkoan ez zaie polizia oldartu elkarretaratutakoei.
[EN DIRECTE] Minut de silenci davant de la prefectura de la policia espanyola de la Via Laietana.https://t.co/VmSuqq7XlNpic.twitter.com/9FJAe1WJkv
— VilaWeb (@VilaWeb) October 23, 2019
Bart deitu zuten protestara, España Globaleko idazkari Irene Lozano Bartzelonako kontsulekin biltzekoa zela jakin zenean. Espainiako Gobernuaren baitako erakundea da España Global, nazioartean estatuaren irudia hobetzea helburu duena. Lozanok berak iragarri zuenez, "epaiaren inguruko zalantzak argitzea" zen bileraren helburua, eta ez "iritziak plazaratzea".
Manifestariak bilera egin behar zuten tokian bildu eta gutxira jakinarazi dute, ordea, batzarra bertan behera utzi dutela. Arrazoi gisa, ez dituzte protestak aipatu, azken orduetan jasaten ari diren denboralea baizik. Erakundeak komunikatu batean azaldu duenez, "oraintxe, Espainiako Gobernuak lehentasun bat du: uholdeei kasu egitea".
Poliziaren egoitza atarian bildutakoek, aldiz, garaipentzat jo dute bilera bertan behera geratu izana, eta "eraikin hau liburutegi bat izango da" oihukatuz ospatu dute erabakia. 14:00ak aldera, ekintza amaituzat eman du ANCk.
Bestalde, unibertsitateko ikasle talde batek Bartzelonako Etorbide Nagusia moztu du arratsaldeko lehen orduan. Ikasleek eserialdi bat egin dute kale nagusia Unibertsitate plazarekin gurutzatzen den gunean.
Gran Via moztu dute Universidad plazarekin gurutzatzen den puntuan. Eserialdia sententziaren, eta, jarrita dagoen batek esan digunez, Katalunian “gertatzen ari den guztiaren” kontra protesta egiteko. @berriapic.twitter.com/WJZwmd0DiL
— Igor Susaeta (@Txuster81) October 23, 2019
Gaur iluntzerako elkarretaratze batzuetara deitu du ANCk herri eta hirietako plazetan. Sabadellen, irailaren 23an Guardia Zibilak atxilotu zituenen aldeko elkarretaratze bat egingo dute, polizia operaziotik hilabetera. Bihar, berriz, Hong Kongekiko elkartasun ekitaldi bat egingo dute Txinak Bartzelonan duen kontsulatuaren parean.
