FARCek bere jardun armatuan zibilei kalte egin izana onartu du. Gerrillak Habanako bake negoziazioetan duen ordezkaritzak egin du aitorpena, hedabideen aurrean irakurritako adierazpenean. Zehaztu zutenez, populazio zibila ez da sekula "ez lehen mailako ez bigarren mailako helburua" izan, baina hala ere berarengan izandako eragina onartu zuten gerrillariek: "Gure ekintzen ondorioak ez dira beti aurreikusitakoak izan. Horren ondorioak gure gain hartzen ditugu". Alde horretatik, dagokien erantzukizuna hartzeko konpromisoa erakutsi du FARCek.
Pablo Atrato gerrillariak irakurri zuen adierazpena kazetarien aurrean, eta FARCen jardunak zibilengan kaltea eragin izana "agerikoa" dela esan zuen. Edonola, eragin hori beti nahi gabekoa izan dela zehaztu zuen gerrillako ordezkariak. FARCeko kideren batek zibiliei "kaltea nahita" eragin dion kasuetan gerrillari hori zigortu egin dutela ere zehaztu zuten.
FARC gerrilla eta Kolonbiako Gobernua gatazkaren bikimei buruz ari dira eztabaidatzen joan den abuztutik, Kuban egiten ari diren negoziazioen harira. Orain arte, akordiorako oinarriak lortu dituzte lurrei, parte hartze politikoari eta drogei buruzko ataletan.
