NBE Nazio Batuen Erakundera jo du Venezuelako presidente Nicolas Madurok, ustez Kolonbiak eta AEBek prestatutako estatu kolpe bat salatzeko: «Hil egin nahi ninduten. Hori zen euren helburu nagusia». Caracasko iturrien arabera, igande goizaldean paramilitar talde bat ahalegindu zen herrialdean sartzen. Baina militarrek atzeman egin zituzten. Haietako bi atxilo eraman zituzten eta beste zortzi hil. Astelehen gauean, berriz, beste zortzi paramilitar atxilotu zituztela jakinarazi zuten. Atxilotuetako bat litzateke AEBetako droga kontrolerako erakundearentzat lan egiten duen Venezuelako herritar bat.
«Itsasotik inbaditzen saiatu dira», esan du gobernuak, «herrialdean ekintza terroristak egiteko, gobernu iraultzailearen buruak hiltzeko». Diosdado Cabello Biltzar Nazional Konstituziogileko buruak adierazi duenez, informazio zerbitzuek lorturiko datuei esker lortu dute saioa zapuztea.
Jorge Arreaza Atzerri ministroaren esanetan, Venezuelako armadako desertore talde batek eta AEBetako indar berezietako kide ohi batek euren gain hartu dute operazioa, eta baieztatu dute Kolonbian antolatu zutela, eta handik irten zirela itsasontziak Venezuelara. «AEBek Venezuelaren aurka antolatutako beste ekintza bat da eraso hau», gaitzetsi du Arreazak, eta gogora ekarri du Maduroren gobernuari droga trafikoan nahastuta egotea leporatu ziotenekoa. «Venezuelak porrot egitea nahi lukete Elliot Abrams AEBetako ordezkari bereziak eta Mike Pompeo Estatu idazkariak. Horregatik, NBEko Segurtasun Kontseiluari ohartarazten diogu gertatutakoaz. Ez dugu ahaztu behar, gainera, pandemiaren krisia baliatu dutela erasoa egiteko».
Alerta egoera
Kolonbiak ukatu egin du inolako estatu kolpe saioarekin zerikusia izatea, eta «oinarririk gabekotzat» jo ditu Maduroren salaketak. «Nahasmena sortu nahi dute jendeak barne krisia ahantz dezan, eta horretarako asmatzen dituzte halakoak», kritikatu du Kolonbiako Atzerri Ministerioak ohar batean, eta nazioarteari eskatu dio ez dadila «amarruan» erori. Venezuelak, ordea, alertan jarri ditu indar armatuak, beste eraso bat egon daitekeela ohartarazita. Aldi berean, ikerketa bat abiatu dute paramilitarrek «noren laguntza» izan duten argitze aldera.
Kolonbiak eta Venezuelak iazko otsailean eten zituzten harremanak, orduan parlamentuko buru zen Juan Guaido Kolonbiatik Venezuelara sartzen ahalegindu zenean. Hain zuzen ere, hainbat komunikabideren arabera, Guaido bera buru duen oposizioa legoke azken estatu kolpe saioaren atzean. Horiek zabaldu dutenez, atxilotutakoetako batek onartu du oposizioak ordaindu egin ziola Maduroren aurkako operazioa zuzendu zezan.
