Serbiako Fiskaltzak zabaldutako informazioaren arabera, zortzi polizia ohi serbiar atxilotu dituzte, 1995ean Srebrenican (Bosnia eta Herzegovina) egindako sarraskian parte hartu zutelakoan. Fiskaltzak nabarmendu duenez, lehen aldiz atxilotu dute norbait Serbian, sarraski harekin "zuzeneko" lotura duela egotzita. Lehendik, Ratko Mladic eta Radovan Karadzic Bosniako serbiarren buruzagi ohiak atxilotu zituzten, besteak beste, 2011n eta 2008an.
Ratko Mladic jeneralaren agindupean ziren tropa serbiarrek 8.000 gizonezko musulman hil zituzten Bosnia eta Hertzegovinako Srebrenica hirian. Hagako Nazioarteko Zigor Auzitegiak 2007an Srebrenican gertatutakoa genozidioa izan zela onartu zuen. Mladic-ez gain, Karadzic ere ari dira epaitzen Hagan.
