Alternatiba eguna egingo dute, klima aldaketaren desafioa gainditzeko

Batetik, erretreten erreforma, azkenaldian mahai gainera ekarri duena berriz Frantziako Gobernuak; bestetik, klima aldaketa. Batak bestearekin ez duela baitezpada gauza handirik ikustekorik pentsa dezakeenarentzat erantzuna badu Jean-Noel Etxeberri Txetx Alternatiba egunaren antolatzaile eta Bizi mugimenduko arduradunak: «Langileen lanaldia luzatzean, nehoiz ez da gogoetatzen luzatzen dela produkzioa, kontsumoa; horrek zer ondorio du ingurumenean, baliabideetan, energia mailan?». Larrialdi egoera horretaz gizartea jabetzea, hori da urriaren 6an Baionan iraganen den Alternatiba egunaren helburuetako bat.

«Planeta bakarra dugu. Ezin dugu birtualki funtzionatu, bakarrik zifrei eta oreka matematikoei begiratuz», beti Etxeberrik erranik. Frantziako CNRS ikerketa zentroak idatzi agiriak klimaren gehiegizko azeleratzea 2035ean iritsi daitekeela nabarmendu du, harrituz horrelako datuek ez gehiago bazterrak inarrostea: «Zer zentzu ukanen du erretreten kontuen orekak, lehengaiak biziki garestituko direlarik? Erosketa ahalmen apalengatik baliabideak eskuragaitzak izanen direlarik? Barne produktu gordinaren parte handi bat klima nahasmenduaren ondorioak konpontzeko erabiliko dutelarik?».

Egoera hori guztia berriz ere agendetara sarraraztea lortu nahi lukete Alternatiba egunarekin. Europa mailako ekitaldia izateko esperantzarekin dute prestatua, etortzekoak diren ehun mintzalarien sena baliatuz, eta ekitaldiaren manifestua izenpetu duten 150 bat egiturak oihartzun.Parisen 2015ean iragaitekoa den Nazio Batuen Erakundearen klima aldaketari buruzko Cop 21 jardunaldia dute jomuga.

Ikuspegi ilunari, ordea, irri deliberatuarekin erantzutea da ere ideia. Sakrifiziorako joeratik urrun: «Milaka egitasmo daude klima aldaketa molde eraginkorrean borrokatzen dutenak. Horiek guztiak ezagutaraztea, zabaltzea eta biderkatzea da xedea», esan du Biziko Elise Banconek. «Gizarte neurtuagoa, humanoagoa, atseginago eta solidarioagoa» posible dela frogatuz. Eguna ez dute bururapen baten modduan ikusten, baizik eta «dinamika berri batzuen oinarri» gisa, zehaztu du Etxeberrik.

Autoei hetsiko dietela Baiona hiri barna, karrikaz karrika, alternatiba horien aspektu guztiak ordezkatuko dituzte. Ura, garraioak, herri mailan antola daitezkeen alternatibak, finantzaketa arduratsua, elkartasuna, ontasun publikoak, kultura, laborantza eta janaria eta ekonomiaren berlokalizatzea izanen direla gaietako batzuk, eta moneta ofiziala, Euskoa.

Hessel ugazaitari omenaldia

Stephan Hessel, nazien aurkako erresistentziako kide ohi, diplomatiko eta idazle zenak Alternatiba egunaren ugazaita izatea onartu zuen zendu aitzin, iaz, baita sostengu testu bat idatzi ere. Heriotzatik landa, hitzartze horrekin segitzeko baimena eman zien Christiane Hessel-Chabry emazteak, senarraren engaiamenduak bizitzen segi zezan. Hesselen sostengua, topaketa-omenaldi bihurtzekoa dute, Hessel-Chabry tarteko, «kontzientziak iratzarrarazteko», Etxeberrik azaldu duenez.

Eguna «herrikoia» izatea nahi dute, bazkari, antzerki eta musika tarteko. Motives eta Willis Drummond taldeen kontzertuarekin bukatuko da, horregatik. Ekitaldia hastetik buru dohainik izaki, laguntzaile boluntarioak izanen ditu bizkarrezur. Laguntzaile gisa parte hartu nahi dutenei deia egin dute.