Metroko 3. linea 2004ko aurrekontuan baino %38 gehiago kostatuko da

Eusko Jaurlaritzako Ingurumen eta Lurralde Politikako sailburu Ana Oregik aitortu du Bilboko Metroko 3. linea egiteko lanak %38 garestituko direla, 2004. urteko aurrekontuarekin alderatuz. Urte hartan, lanek 151 milioi euroko kostua izango zutela zehaztu zuten. Baina, gutxienez, 208 milioikoa izango da kostua. Lanak 2016ko abenduan amaituko dituztela esan zuen atzo Oregik, nahiz eta zati asko 2014ko amaierarako bukatuko dituzten. Txurdinagako tunelean egin dituzten aldaketek, adibidez, hamazazpi milioi euro garestitu dituzte lanak. Iraila baino lehen, Eusko Jaurlaritzak hitzarmen berri bat sinatuko du Bizkaiko Foru Aldundiarekin, proiektuaren finantzaketa eta garapena ziurtatzeko.