2012. urteko urrian errandakoa errepikatu zuen atzo Marylise Lebranchu Deszentralizazio ministroak: Ipar Euskal Herriaren egituraketaz hitz egiteko, bertako ordezkaritza batekin bildu nahi du. Martxo bukaeran iragatekoak diren herriko bozkak eta gero, Ipar Euskal Herriko ordezkaritza batekin eta bertako parlamentariekin bilkura bat egin nahi du. Dena dela, berriro ere argi utzi zuen lurralde elkargorik ez dutela sortuko Ipar Euskal Herriarentzat.
Xede hori jakinarazi zuen atzo Frantziako Legebiltzarrean, Sylvia Pinel Merkataritza ministroaren bidez. Hain zuzen, une berean Lebranchuk bilkura bat zuen Jean-Marc Ayrault Lehen ministroarekin, eta bere mezua irakurtzeko ardura utzi zion Pineli. Sylviane Alaux parlamentariak egin galderari emandako erantzunean jakinarazi zuten elkartzeko gogoa.
Alauxek, mezua Vallsi
Euskal Lurralde Elkargoaren sorrera errefusatzeko «benetako arrazoiak» zein diren galdetu zion atzo Alauxek Manuel Valls Barne ministroari, legebiltzarrean. Ipar Euskal Herriko gehiengo zabalak eskatutakoa Korsikan egingarri dela ohartarazirik, Parisen postura deitoratu zuen parlamentari sozialistak: «Inkoherentzia horrek ulertezintasuna ondorioztatzen du Euskal Herrian». Hitz hartzean, oroitarazi zien «hats luzeko lan bati esker» bortizkeria alde batera utzirik dagoela Euskal Herrian. Aldaketa hori kontuan hartu beharra ere nabarmendu zion.
Lebranchuk Ipar Euskal Herriko ordezkaritza batekin biltzeko nahia berretsi du
«Herriko bozkak pasatu eta gero» Ipar Euskal Herriaren egituraketaz mintzatzeko prest dela zehaztu du ministroak
Iruzkinak
Ez dago iruzkinik
Ordenatu
