Israelek «armadaren indar hilgarriaz» aurre egingo die mehatxuei

«Israel ezabatu nahi duenak edo estatuari min egin nahi dionak armadaren indar hilgarria nolakoa den jakingo du», ohartarazi du Benny Gantz Israelgo armadaburuak. Irango estatuburu Ali Khamenei aiatola eta Mahmud Ahmadinejad presidenteen joan den asteko adierazpenei emaniko erantzuna izan da. «Mehatxu zuzenak entzun ditugu egunotan», gogorarazi du armadaburuak.

Hauexek Khameneiren berbak: «Israel desagertu egingo da munduko geografiatik, eta lurralde islamikoa nazio palestinarrarena izango da berriro». Hauek, berriz, Ahmadinejadenak: «Ekialde Hurbil berrian ez da egongo ez amerikarrik, ez sionistarik».