Albistea entzun

REALA 1. SEVILLA 1

Argirik ezean, kemena

Reala ez da batere eroso aritu Sevillaren joko sistema zekenaren aurka, baina merezitako puntua urratu du galtzen hasi ondoren

Irailean jokaturiko sei partidetatik hiru galdu egin ditu eta hiru berdindu
Antoine Griezmann Realeko aurrelaria baloia kontrolatzen saiatzen, Sevillako hiru atzelariren artean, atzoko partidako jokaldi batean.
Antoine Griezmann Realeko aurrelaria baloia kontrolatzen saiatzen, Sevillako hiru atzelariren artean, atzoko partidako jokaldi batean. JON URBE / ARP

Imanol Magro -

2013ko irailak 29

Golak: 1-0: Jairok (17. min.); 1-1: Griezmannek (65. min). Epailea: Velasco Carballo. Txartel horiak: Sevillako Cristoforo, Figueiras, Alberto eta Rakitici, eta gorria Calari (bi hori, 84. min.). Bestelakoak: 25.086 ikusle Anoeta estadioan.

Berdinketa guztiak ez dira berdinak. Berdin balio dute, baina ez dute gorputzaldi berdina uzten. Partidaren bukaeran ikusleak isilik gelditu ziren, ez zekiten txalo egiteko moduko partida ikusi berri zuten, edota lehen txistuak egitea zilegi zen. Iragan astean Realak berdinketa zozoa lortu zuen Malagaren aurka; atzo, aldiz, bizi eta urduria Sevillaren kontra. Agian 0-1 galtzen hasi zelako, eta bigarren zatian itxura ona eman zuelako, atzokoak aho zapore pixka bat hobea utzi zuen.

Reala Sevilla baino hobea izan zen, eta fede gehiagoz bilatu zuen atea. Baloia kontrolpean izan zuen halaber, eta aukera gehiago sortu zituen. Baina ez zituen baliatu, eta, esan bezala, berdinketa guztiek berdin balio dute: puntu bat. Puntu urria da, Realak irailean jokaturiko sei partidetatik —Ligako bost eta Txapeldunen Ligako bat— hiru galdu eta hiru berdindu dituelako. Duela justu hilabete dena zen euforia Lyon kanporatu ondoren, eta lau aste aski izan dira lehen itzalak agertzeko. Uzta eskasaren erruz txuri-urdinak jaitsiera postuetatik gertuago daude Europatik bainoago, eta egutegia urduritasuna sortzeko modukoa da: hurrengo lau partidak etxetik kanpo jokatuko ditu, bina ligan eta Europan.

Zaleak liga hasiera lasaituko zuen garaipena ikusteko asmoz joan ziren Anoetara, eta ez zen hala izan. Sevilla konforme joan zen etxera, balio handiko puntua eskuratuta. Aurkariek dagoeneko ezagutzen dute Reala eta ez diote erraztasunik ematen. Bukatu dira Anoetan libre jokatzeko aukerak, partida bakoitzean harresi bat bota beharko du. Sevillak atzean sartuta itxaron zion eta Emeryk ahal fisiko handiko erdilariak zelairatu zituen Realaren sormena oztopatzeko. Itogarria Trochowskik lehen zatian Velari eginiko zaintza.

Realak lehen zati iluna egin zuen. Sevillak oparituriko baloia alde batetik bestera mugitu zuen baina sakontasunik gabe. Kanpokoek, aldiz, izandako lehen aukera baliatu zuten. Rakiticek pase neurtua eman zion Jaiori, eta erdilari biziak bikain kontrolatu zuen area barruan Iñigo eta Bravoren gainetik loratzeko (17. min). Golak ez zuen Reala jota utzi, baina partida ez zen gehiegi aldatu. Griezmannek aukera ona huts egin zuen area barruan labaindu zenean (29. min), baina erasoko jarioa ez zen handia. Sevillak, aldiz, oparia egin zuen (39. min). Pase pare bat aski izan ziren Trochowski ate hutsaren aurrean bakarrik gelditu zedin. Baina ez. Huts egitea sartzea baino zailagoa zen.

Bigarren zatian Realak irudi askoz hobea eman zuen. Arrasatek aldaketa taktikoekin asmatu zuen: Griezmnann ezkerrera, Castro eskuinera eta Vela pixka bat gorago. Izaera ere aldatu zen, oldarkorrago zelairatu baitzen, eta gola bi aldagai horien fruitu izan zen (65. min). Velaren erdiraketa Griezmannek jo zuen buruz, eta berak ehizatu zuen Beto atezainaren aldaratzea gola sartzeko. Aurrelari frantziarra Diogo baino aztiagoa ibili zen.

Hortik aurrera Realak jokatu zuen bakarrik, Sevillak muzin egin ziolako partidari. Are zekenago jokatu zuen, eta bide batez, oso serio. Emeryk defentsa mugimenduak ondo lantzen ditu eta jokalariek diziplina handiz bete zituzten aginduak. Puntua altxorra zen eurentzat. Seferovicen irteeran mesede egin zien etxekoei, baina ez zuten golik lortu. Reala ez da iragan sasoikoa eta presek ez zuten lagundu. Egoera deserosoa da eta jokalariek badakite, zelai gainean nabaritzen zaie.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Itziar Gonzalez de Arriba, bere kontsultan, Irunen. ©ITZIAR GONZALEZ DE ARRIBA

Zer jan, hura izan

Julen Etxeberria

«Mina kendu dit nutrizionistak», aitortu du Joseba Ezkurdiak. Itziar Gonzalez de Arribari buruz da. Haren iritziz, «osasuntsu jateak indartsuago egiten zaitu, eta Joseba da horren adibide argia».
Erika Vazquez Athleticeko jokalaria, atzo, Lezaman, agur prentsaurrekoan. ©MONIKA DEL VALLE / FOKU

Erika Vazquez: «Pribilegiatu bat izan naiz»

Ainara Arratibel Gascon

Aurrelari zuri-gorria «pozik, harro eta asebeteta» utzi du futbola. Lehen egunetik Athletic bere lekua zela sentitu du
Amorrazio keinuarekin ospatu zuen garaipena atzo Dries de Bondtek, Trevisoko helmugan. ©MAURIZIO BRAMBATTI / EFE

Apalenei gorazarre

Aitor Manterola Garate

Lau lagunek egin dute ihes 18. etapan, eta Dries de Bondt (Alpecin) izan da azkarrena. Joao Almeidak lasterketa utzi du, COVID-19agatik
Iazko arantza atera du De Bondtek

Iazko arantza atera du De Bondtek

Aitor Manterola Garate

Flandriarrak hirugarren etapa garaipena eman dio Alpecin taldeari aurtengo lasterketan. Lau laguneko ihesaldia heldu da helmugara. Iaz, laugarren izan zen etapa batean.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.