Elizari eta aberriari lotuta

Eliza eta aberria. Bi hitz horiek ederki definitzen dute Andoni Perez Cuadradoren ibilbidea (Gasteiz, 1926). Eliza: Arabako Gazteria Katolikoaren lehendakariorde izan zen, eta konpromisoaren sinonimo ditu eliza eta ebanjelioa. Aberria: 1936ko gerra ostean abertzaletasunak Araban izan zuen historiaren lekuko bizia da. 1956tik 1961era EAJk Araban izan zuen militante bakarrenetakoa izan zen, buru denak atxiloturik zeudenean.

Inoren aurrean ez dela makurtu dio, ez bada jainkoaren aurrean. Horren ondorioz, atxilotua izan zen hamalau aldiz, eta hiru urte eta bi hilabeteko espetxe zigorra jaso zuen. Bere bizitzan izandako gorabehera profesional eta pertsonalek ez diote sekula umore ona kendu, ezta Meliton Manzanas Irungo komisarioak torturatu zuenean ere.

EAko militantea da haustura gertatu zenetik, eta Euskaria Fundazioko kide ere bada. Autodeterminazioaren Biltzarrean aritu zenean, burujabetzaren aldeko desobedientzia bultzatu zuen, Bruselako Legebiltzarreko diputatu batzuei espainiar nazionaltasunari uko egiten ziola publiko adieraziz.