Atzo hasi zen udaberria. Gero eta gehiagotan entzuten dira «atzo hasi zen ofizialki udaberria» bezalakoak udaberria hasi dela iragartzeko. Ofizialki iragartzeko. Udaberria gauza on, baikor, alai, eder, liluragarri guztien iragarle eta are ekarletzat ere jotzen denez, maitasunaren sasoia, atzera erakargarri sentitzen hastekoa, lehenago horrelako zerbait sumatzean (egun eguzkitsua, esaterako, otsailean), egonarririk gabe udaberriaren zantzua dela irizten diogu eta, haur logikarekin, atzerakorik gabekotzat hartzen dugu. Enpresek ere udaberriaren izenaalferrik erabili ohi dute, jakinki udaberria aipatze hutsarekin salmentak biziagotuko direla. Bada, azkenik hasi da udaberria, ofizialki.
Hotzez eta elurraz ere hasiko dela iragarri zuen, pertsonalki hunkituta, eguraldi gizonak. Negua aipatu zuen («negua bueltan da»: beraz, amaitutzat jotzen zuen epearen aurretik). Negua gauza goibel, ilun, hotz eta arbuiagarri guztien ikurra delako, jakina. Meteorologoari ez zirudien udaberrian eguzkiak jotzea beste aukerarik buruan sartzen zitzaionik. Batek daki ez ote zuen lanpostua arriskuan ikusiko «eguraldi ona» iragarri ezean.
Batzuetan uste dut egunen batean urtaroak indargabetuko dituztela legez, ofizialki.
JIRA
Ofizialki
Iruzkinak
Ez dago iruzkinik
Ordenatu