GEURE KONTU

Siemens Gamesa, haizerik gabe

Miranda Ebroko planta ez ixteko protesta, Zamudion, ostegunean.
Miranda Ebroko planta ez ixteko protesta, Zamudion, ostegunean. M.R. ARP Tamaina handiagoan ikusi

Xabier Martin -

2018ko otsailak 18

Ez zioten egia esan elkarri. Siemensek gorde egin zuen, adibidez, AEBetako bere fabriketan stock izugarria pilatzen ari zitzaiola inbertsioak seko gelditzen ari zirelako; laguntza fiskalak nabarmen apaltzeko Trumpen iragarpenak dardara handia eragin zuela jadanik Siemensen negozioan. Gamesak ez zuen esan, era berean, Indiako onshore negozioa gelditzen hasia zela, kolapsaturik zegoela; ez zuen esan errentagarria izanagatik Indiarekiko menpekotasun handiegia zuela, adibidez. Alegia, doteak ez zirela esandakoaren parekoak, eta ezkongaien edertasuna makillaje kontua zela hein batean. Baina ondasun banaketarik egin gabe ezkondu ziren, eta orain, komeriak.

Komeriak, langileentzat lehen-lehenik. Uste baino haize gutxiagoz nabigatuz doa bat egitearen barku erraldoia, eta zama kentzea erabaki dute Berlinen. Gamesak obeditu behar duen erabakigune berrian haserre daude 2017. urte ilunarekin. 135 milioi euroren galerak egon dira azken seihilekoan, fakturazioak %12 behera eginda. Bat egitea gauzatu zenean, iazko apirilean, urte bukaeran balio zuena halako bi zen burtsan Siemens Gamesa, baina 7.000 milioi euroko balioa galdu du azken hilabeteetan, eta testuinguru horretan iritsi da kaleratze masiboen iragarpena. 24 herrialdetan 6.000 langile kaleratzen hasi da multinazionala, eta Euskal Herrian ere lantaldeak argaltzen dabiltza. 27.000 behargineko lantaldea 21.000 ingurukoa bihurtzeko xedea dute. Miranda Ebroko lantegiaren balizko itxiera da argaltze horren azken erakusgarria. Ikusteko dago Arabako mugatik ehunka metro batzuetara lan egiten duten 134 behargin denei lekuz aldatzea eskaintzen ote dieten eta, horrela bada, nora.

2012an, Gamesak 2.700 langile kaleratu zituen; besteak beste, horri esker lortu zuen konpainia errentagarrienetakoa bihurtzea eolikoen negozioan. Eta errentagarritasun horri esker piztu zuen Siemens erraldoiaren interesa. Harekin bat egiteak ez zuela zertan kaleratzerik eragin esan zuen artean Euskal Herrian egoitza nagusia zuen zuzendaritzak, sinergiek sortuko zutela aurreztea, eta, erabakigunea galdu arren, ez zegoela zertan urduri jarri. Gaur egungo egoerak hankaz gora bota ditu baretasun mezu horiek guztiak.

2.000 milioi euro aurreztu behar dira

Asteon, Markus Tacke Siemens Gamesako kontseilari ordezkariak zenbakiak jarri dizkio bat egitearen egiari: hiru urtean 2.000 milioi euro aurreztu nahi ditu konpainiak, fusioak izan duen hasiera penagarria zuzentzeko. Gerrikoa estutzeko 2020. urte arteko programa aurkeztu du Madrilen, eta haren lehen helburua ere zehaztu du: errentagarritasuna lortzea. Diru aurrezpen horren %65 hornitzaileei egindako erosketetatik etorriko dela esan du, eta %15-20 inguru produkzio kostuetatik. Gainontzekoa langileen bizkar joango da. 6.000 kaleratzeen prograren ondotik, hala ere, ez direla gehiago egingo esan dute. Eskerrik asko, Tacke jauna.

Era batera edo bestera, galerekin lotutakoak dira Siemensekin egindako ezkontzaren ondorioak. Enplegu galerak, erabakigunearen galerak eta burtsako balioaren galerak bat egin dute. Euskal Herriko hornitzaileek ere asko dute galtzeko, eta kezka adierazi dute, Siemens Gamesa «gehiegi estutzen» ari zaielako, errentagarritasun dena kenduz. Bakarrik Gamesarentzat aritzen diren batzuk beste bezero batzuen bila dabiltza, eta ezin da baztertu hornitzaileen artean ere kaleratzeak egotea. Euskal hornitzaileei erosten jarraituko zutela esan zuten Gamesako buruek, Berlinen egongo zela botere zentroa, baina ez zutela abandonatuko Gamesarekin batera eta haren inguruan sortutako industria.

Hitzak eramaten dituen haizea balu, akaso barku handi berri horrek ez zuen utziko atzean hain lorratz tristea, baina egungo merkatu eolikoaren itsaso barean ontzi arinak soilik dabiltza aurrera, antza. Geroa bermatzea ei zen fusioaren helburua, baina batzuena baino ez du hobetu gaurdaino.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Donostiako Ramontxu Berri tabernan egondako 683 laguni egin ziete proba, atzo ©Gorka Rubio / Foku

Hego Euskal Herrian, 492 positibo

Berria

Pertsona bat hil da Nafarroan, uztailaren 15etik lehena. Uztailaren 27tik abuztuaren 3ra Galdakaoko Muguru tabernan izan ziren 420 laguni PCR proba egingo diete, eta Donostian PCR-ak egiten jarraituko dute Ramontxu Berriko bezeroei.

Iñigo Urkullu Eusko Jaurlaritzako lehendakaria, iragan astelehenean, Gasteizen ©Jaizki Fontaneda / Foku

«Erantzukizunerako» deia egin du Iñigo Urkulluk

Joxerra Senar

Sare sozialetan zabaldutako ohar batean, Eusko Jaurlaritzako jarduneko lehendakariak ohartarazi du «denen artean ahal den guztia» egin behar dela lehen olatuan bizitako egoera dramatikora ez itzultzeko.

 ©ARITZ LOIOLA / FOKU

Eragile guztiekin biltzeko eskatu dio oposizioak Eusko Jaurlaritzari

Olatz Esteban Ezkati

538 positibo atzeman dituzte Hego Euskal Herrian, iragan astean halako bi. Ospitaleratzeak ere bikoiztu egin dira egun batean: 103 pertsona daude erietxean.

 ©RAUL BOGAJO / FOKU

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna