Noiz sortua: 2018-05-09 00:30:00

Fagor Etxetresnetako presidenteak borondatezko ekarpenak egin zituen

Derrigorrezko ekarpenak ez ezik, 2011n egindako borondatezkoak ere galdu zituen Javier Retegik. Esan du Mondragonek ez zuela bermatu finantzaketa etengaberik, eta ez ziela hori esan bazkideei
Mondragonen aurkako epaiketa, atzo, Bergarako epaitegian.
Mondragonen aurkako epaiketa, atzo, Bergarako epaitegian. XABIER MARTIN Tamaina handiagoan ikusi

Xabier Martin -

2018ko maiatzak 9

Javier Retegi Fagor Etxetresnak kooperatibaren kontseilu errektoreko presidenteak borondatezko ekarpenak egin zituen 2011n, enpresa krisi betean sartua zegoela, eta hark porrot egitean, diru hori galdu zuen, derrigorrezko ekarpenekin batera. Defentsaren abokatu Arantza Estefaniaren galderei erantzunez onartu zuen halakorik Retegik; «atzo [herenegun], beste lekukoei galdetu zeniena ez diozunez honi galdetu, neronek galdetuko diot», esan zion defentsak akusazioari, Raul Tenesi. Ana Mari Beristain kooperatiba hondoratuaren presidenteordeak ere bazituen borondatezko ekarpenak, eta hark ere galera jasan zuen, Mondragon epaitegira eraman duten Eskuratuko eta Ordainduko 957 bazkide ohiek bezala. Guztira, 3.600 bazkide aktibok eta inaktibok galdu zuten dirua 2013ko porrotean, eta soilik lautik batek jarri du Bergaran argitzen ari den salaketa.

Demandatzaileak «engainatu» egin zituelakoan, Mondragoni 48 milioi inguruko eskaera jasotzen duen demandaren epaiketak bigarren saioa izan zuen atzo, eta aurreko egunaren ildotik joan zen: Raul Tenes akusazioko abokatuaren ezintasunarekin. Hainbat agiritan jasorik dauden esan zehatzak oinarri hartuta galdera zaparrada handia egin zuen akusazioak, atsedenik gabe, eta Mondragon zein Fagor Etxetresnak ohiaren agintariek erantzunak eman zituzten; akusazioaren gustukoak ez ziren erantzunak, inondik ere, Mondragonek Fagor Etxetresnen kudeaketan esku hartu zutela gezurtatu baitzuten behin eta berriro, herenegun gertatu zen antzera.

Jaulkipenak luzatu ziren

Javier Retegik ez zuen zalantzarako tarterik utzi: bazkide guztiek zuten enpresaren egoeraren inguruko informazioa; ez zuen sekula bermatu kooperatibaren geroa bazkideen aurrean, eta Mondragonek ez zion finantzaketa etengabea eskaini; beraz, ez zien hori esan bazkideei, Tenes abokatuak aditzera eman nahi izan zuen gisan. Retegik azaldu zuen egiaz esan zuela zor handiena ez zela bankuekin, «horrela zelako». Mondragonekin, erakunde publikoekin eta bazkideekin zuen kooperatiba zenak zor handiena, bankuenari soluzioa eman zitzaiolako 2012. urteko lehen seihilekoan.

Bazkideei pagatzeko zergatik ez ote zuten zuzendaritza organoetan formulak aztertu galdetu zion akusazioak, eta orduan ere, erantzun azkarra iritsi zen: «2012ko amaierara arte borondatezko ekarpenak eskatzen zituenak hilabetean berreskuratzen zituen». Gero, likideziak bukaera eman zion egoera horri. Retegik berak diru hori galdu zuen, 2011n egin zituelako ekarpenak. «Besteentzat eredugarriak izan behar zuten, bazkideek dirua atera ez zezaten», esan zion prentsari Raul Tenes abokatuak, epaiketa bukatzean, Retegi eta Beristainen galera azaldu nahian. «Norberaren diruarekin eredua ematea ez da egokiena izaten. Jarrerarekin egitea, tira, baina diruarekin...», esan zuen Arantxa Estefania defentsako abokatuak. «Dirua norberaren etxean esplikatu behar da, eta ez gara ari gaitasun ekonomiko handiko pertsonei buruz».

Horiek horrela, Mondragonen engainuaren teoriak indarra galdu du epaiketaren lehen bi egunetan, eta akusazioak berak onartu zuen, atzo, agirietan dagoela bere salaketaren esperantza. Lekukoek frontoi baten moduan itzuli diote akusazioari Mondragon eta Fagor Etxetresnak gauza bera direlako idatzita daraman pilota. Izan ere, hala Javier Retegik, nola Ana Mari Beristainek argi utzi zuten Fagor Etxetresnak enpresaren zuzendaritza organoetan hartu zirela erabaki guztiak, eta kooperatibaren batzarraren (bazkideak) oniritziarekin. Esaterako, borondatezko ekarpenen jaulkipenak luzatzeko erabakia.

Aurreko egunean baino bero gutxiago zegoen Bergarako areto txikian, besteak beste, Angela Rodriguez-Monsalve epaileak bi haizagailu jartzea deliberatu zuelako hasi aurretik. Eta, hala ere, Tenes abokatuak akitu itxura eman zuen tarteka. Epaitegiaren alboan dagoen San Pedro elizako kanpaiek ez zioten askorik lagundu, gainera. Bat-batean probak egiten hasi ziren, eta galderak entzuteari utzi zioten ia denek. Danbadak amaitzean jarraitu zuen Sunion bulegoko togadunak, eta aurrean Agustin Markaide lekukoa jarri zitzaion, Mondragoneko Kongresuko lehendakari ohia.

Markaide, patxadaz

Txema Gisasola Mondragoneko presidente hautatzeko prozesua azaldu zuen Agustin Markaidek, galderak patxadaz erantzunez. Prozesua erabateko normaltasunez egin zela kontatu zuen, eta aurreko lekukoek esandakoa berretsi, Fagor Etxetresnen inguruan. Onartu zuen Mondragonen aztertu zutela konkurtsoaren bidez zenbat enplegu salbatuko ote zen, beste aukera askoren artean. Gero, akusazioak uko egin zion Javier Sotil deitua zuen lekukoaren testigantzari. Gaur, Xabier Bengoetxea eta Sergio Trebiño dira deklaratzekoak, baita Ane Alkorta konkurtsoko kudeatzailea ere.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Ekainaren 2an eguneratua, 19:00etan. ©BERRIA

Koronabirusaren azken datuak

Berria

Azkeneko 24 orduetan bi lagun hil dira COVID-19 gaitzaren eraginez. Bost positibo atzeman dituzte PCR probekin, eta lau gaixo ospitaleratu dituzte. Euskal Herrian 29.406 gaixok eman dute positibo guztira, koronabirusa atzemateko probaren bat eginda. Horietatik 2.068 hil dira. Grafikoak, albiste barruan.

Bilboko errepideak konfinamendua hasi berritan. ©Marisol Ramirez / Foku

Nafarroako Gobernuak udako herri bestak bertan beheiti uzteko gomendatu du

Berria

Nafarroako Osasun Publikoko Institutuak nabarmendu du herri bestetan zaila dela segurtasun eta osasun neurriak betetzea. Hala, halakoetan birusa zabaltzeko arriskua ikusita, bestak bertan beheiti uzteko gomendioa egin du gobernuak. 

Gallartako agerraldiaren irudia, Josu Erkorekaren Twitter kontuan agertua ©@Jerkoreka

Urkulluk Euskal Herri osoan ibiltzea baimentzeko eskatu die Frantziari eta Espainiari

Gotzon Hermosilla

Jaurlaritzak espero du Araba, Bizkaia eta Gipuzkoa hirugarren fasera pasatuko direla astelehenetik aurrera. Salvador Illak aurreratu du hirugarren fasean ezingo dela erkidego batetik bertzera mugitu. 

Adegiko zuzendaritzako kideak, gaurko agerraldian. ©ANDONI CANELLADA / FOKU

Adegi bat dator ELArekin erregulazioan daudenen soldata osatzeko

Xabier Martin

Osatze horiek egin ahal izateko finantzaketa, ordea, ez du nahi "bakarrik enpresaren bizkar uztea". Ekonomia %7 eta %10 artean uzkurtuko dela aurreikusi du Gipuzkoako patronalak, eta azken bi urteetan sortu diren 12.000 enpleguak galdu egingo direla.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna