«Aniztasunaren eta heterogeneotasunaren aldeko apustua egin dugu». Garbiñe Ortegarenak dira hitzok; atzo eman zituen Ikuspuntu jaialdiaren xehetasunak, Fernando Perez Nafarroako Kultura zuzendari nagusiarekin batera eginiko agerraldian. Aurten film «paregabeak eta originalak» aurkezteko dituztela adierazi zuen. Perezek, Ortegaren «zorroztasuna eta gustua» txalotzeaz gain, jaialdia «etengabe» hazten ari dela esan zuen. «Haatik, betiko ideia bera aldarrikatuko dugu: errealitateari begiratzeko ikuspuntu anitz existitzen direla».
FOKUA EMAKUMEENGAN
Nafarroa «zinema dokumentalaren erreferentziazko espazio» gisa kokatzeko helburuarekin, tokiko zinemagileak babesten saiatu dira. Horrekin batera, zinemagile horien «unibertso femeninoei» ikusgaitasuna eman nahi izan diete, Kultura zuzendariak azaldutakoaren arabera.Hain zuzen ere, jaialdiaren irekiera saioan, Ainara Vera zuzendari nafarraren film berria aurkeztuko dute: Hasta mañana si dios quiere. Lan hori zinema dokumentaleko nazioarteko jaialdirik garrantzitsuenetako batean aurkeztu dute, Herbehereetako IDFA festibalean; eta, Ortegaren hitzetan, «lan bikaina» da. Bestalde, aurten, Marina Lameiro eta Maddi Barber zuzendari nafarrek Sail Ofizialean parte hartuko dute Young and Beautiful eta Yours Truly lanekin, hurrenez hurren. Horrez gain, aurtengo kartela Dani Sanchisek sortu du, eta horretan ere emakumearen presentziak pisu handia du. «Hiru ikuspuntu femenino» irudikatu nahi izan ditu.
Ortegaren ustez, emakumeen parte hartzea handia izatearen arrazoietako bat da Ikuspuntu jaialdiak, urtetan, zinema eredu zehatz batzuen alde apustu egin izana. «Esanguratsua da festibalean hainbat belaunalditako emakume zuzendari bikainek parte hartzea; baina ez da kasualitatea hori hiri honetan gertatzea».
1968KO MAIATZA GOGOAN
Aurten, mende erdia beteko da 1968 Maiatzeko Iraultza gertatu zela, eta Ikuspuntuko antolatzaileek abagune historiko hori ospatu nahi izan dute. Urteurrena aprobetxatuko dute erakusteko, egun, «kontzientziadun» zinema eredu bat existitzen dela, «zeri eta nola» begiratu zalantzan jartzen duena, eta «indartsu bezain hunkigarria» dena.MARGOTUTAKO ZINEMA
Aurtengo jaialdian Jose Antonio Sistiaga margolari eta zinemagile donostiarra omenduko dute. Sistiaga «kamerarik gabeko zinema» gisa ezagutzen den artearen bultzatzaileetako bat da: zeluloidea eskuz margotzen igaro zituen bi urte, eta, horrekin, Ere erera baleibu izik subua aruaren izeneko filma sortu zuen. Ikuspuntu jaialdiak, berriz, artista sortu zuen dokumental bakarra eskainiko du, 1972an Iruñean egin zen nazioarteko abangoardia jaialdiaren ingurukoa: Encuentros 72, Pamplona. Lan horrek, kokapen geografikoagatik, «balio erantsia» dauka, Ortegaren irudiko. Sistiagak berak mintzaldi bat egingo du jaialdian: Brakhage artistaren lana aztertuko du, P. Adams Sitney historialariarekin batera.Bestalde, Thinh Minh-ha zuzendari vietnamdarrak ere bisitatuko du jaialdia. «Pertsona gutxi izan daitezke Minh-ha bezain polifazetikoak: zinemagilea, irakaslea, generoan aditua eta konpositorea da», Ortegaren hitzetan.
