Hilabete «positiboa» izan da, Nafarroako Gobernuaren arabera. «Nahiz eta 2017ko apirileko datuak baino apalagoak diren […] sendotu egin da langabeziaren beheranzko joera. Gainera, hurrengo hilabeteotako iragarpenak onak dira». Baikor mintzatu da Beatriz Artolazabal Eusko Jaurlaritzako Enplegu sailburua ere, eta azpimarratu du bere eremuan «azken hiru urteotako apiril onena» izan dela. «Urrats positiboak egiten ari gara aurrera begira, enplegua sortzen eta ekonomia suspertzen». Analisi beltzagoa egin dute sindikatuek, sortzen den enpleguaren zatirik handiena behin-behinekoa dela azpimarratuta.
LANGABEZIA
2009ko iraileko mailan
Orotara, 159.423 daude gaur egun langabezian erregistratuta, Hego Euskal Herriko biztanleria aktiboaren %11,96. Aspaldiko partez, gutxigatik bada ere, langabezia tasa %12ren azpitik gelditu da apirilean, eta 160.000 langaberen langatik behera jaitsi. Maila hori 2009ko irailean gainditu zuen langabezia erregistratuak, eta, orduz gero, ez da gerturatu ere egin.Goia duela bost urte jo zuen langabezia erregistratuak, 2013ko martxoan; orduan 235.827 lagun agertzen ziren lanik gabe Lanbideren eta Nafarroako Enplegu Zerbitzuaren zerrendetan. Orduz gero, 76.404 kide urritu da langabeen zerrenda (-%32,3), horietatik 16.620 azken urtean.
Udaberriko hilabeteetan bereziki ohikoa den bezala, langabeziaren murrizketaren zati handiena zerbitzuen sektoretik iritsi da, alor horretako langabeen zerrendan 2.732 lagun gutxiago zenbatu baitira. Beherakada dezente txikiagoa izan da beste sektoreetan: industrian, 423 langabe gutxiago daude; eraikuntzan, 317 gutxiago, eta nekazaritzan, 213 gutxiago.
Herrialdeka, Bizkaian jaitsi da gehien langabeen kopurua(-1.434), baina lurralde hark du oraindik ere langabezia tasarik handiena (%13,51). Araban, berriz, biztanle aktiboen %13 daude lanik gabe, eta Nafarroan %11,18 dira. Gipuzkoa da %10etik beherako langabezia tasa duen bakarra, %9,76koa, SEPEren eta INEren datuak alderatuz gero.
SEXUEN ARTEKO DESOREKA
Emakumeak, okerrago
Lurraldeen arteko desoreka hori are handiagoa da sexuen artean: langabezian dauden pertsona guztietatik %57 dira emakumezkoak, zehazki 91.006, edo lan merkatuan aktibo dauden emakumeen %14,39. Gizonen artean lau puntu eta erdi txikiagoa da langabezia tasa (%9,78). Desoreka hori handitu egin da azken urtean: 9.000 gizonezko gutxiago daude lanik gabe, baina 7.000ra ez dira iristen langabezia zerrenda utzi duten emakumeak. «Onartezina da emakumeek tasa horiek jasan behar izatea», salatu du Euskadiko CCOOk agiri baten bidez. Hala ere, datu horiek ez datoz bat EHUk joan den astelehenean aurkeztutako EAEko lan txostenarekin, haren arabera emakumeak baitziren azken hiruhilekoetan lan gehien aurkitzen ari zirenak.AFILIAZIOA
4.000 langile gehiago
Ohikoa ez bada ere, apirilean antzekoak dira langabezia utzi dutenen (-3.651) eta lana aurkitu dutenen (+4.005) kopuruak. Udaberria izanik, emaitza onak ekarri ditu lehen sektoreak —443 afiliatu gehiago nekazaritzaren erregimenean eta 80 gehiago arrantzarenean—, autonomoen artean ere zenbaki positiboak izan dira (+220).Denboran urrunago eginez gero, ikusten da galdutako enpleguaren sorrerak gainditu duela langabeen zerrendaren argaltzea. Izan ere, 2009ko martxoan baino76.404 gutxiago dauden arren, tarte horretan Gizarte Segurantzan izena emanda daudenak 104.512 gehiago dira. Hau da, lana aurkitu dutenen laurdenak ez zeuden langabe ofizialen artean.
KONTRATUAK
Mugagabeak bizkorrago hazten ari dira, baina gutxi dira
Azken urtean bizkorrago hazi dira kontratu mugagabeak aldi baterakoak baino, nahiz eta kopuru osoetan oraindik enplegu finkoak ez ziren hamarretik batera iristen. 2018ko apirilak ez du joera hori hautsi: SEPEren arabera, martxotik apirilera %1 inguru hazi dira behin-behineko kontratuak, eta %3tik gora, berriz, kontratu finkoak.Edonola ere, aldi baterakoak dira oraindik kontratuen gehiengo ia erabatekoa: %91,08. Datu horri heldu diote sindikatuek sortutako enpleguaren kalitatea salatzeko. «Penagarria, aldi baterakoa eta partziala da», salatu du Marinel Ballesteros UGT-Euskadiko politika sindikaleko arduradunak. Kontratuen laburtasuna da sindikatuen kexu nagusietako bat; ELAko Mikel Novalek nabarmendu duenez, urtea hasi zenetik 300.000 kontratu sinatu dira Hego Euskal Herrian.Tarte horretan 5.500 lagun desagertu dira langabeziaren zerrendetatik.
