«Isiltasuna meditazioaren ondorio gisa uler daiteke»

Psikologian doktorea da David Alvear (Donostia, 1979), eta urteak daramatza mindfulness teknika ikertzen. Egungo gizarteak meditaziorako gero eta behar handiagoa duela azaldu du, antsietate eta depresio kasuak gorantz egiten ari baitira.

Ikuspegi psikologikotik, zein da isiltasunaren garrantzia?

Isiltasuna ezin da neurtu ikuspegi psikologotik. Ikuspegi fisiko edo auditibotik neur daiteke, baina ikuspegi psikologikotik, nola? Ikuspegi soziologikotik, desazkundea edo bizitza lasaiago batekin harremana izan dezake, eta psikologikotik, meditazioarekin. Momentu batez isiltasunean egotea uneari arreta jartzea da. Horri guztiari arreta jartzeak onura ugari ekar ditzake gaitz psikologiko ezberdinei aurre egiteko garaian.

Isiltasuna azaltzean mindfulness teknikari buruz ari zara?

Mindfulness edo arreta osoaren meditazioa meditazio mota bat da. Budismoan du oinarria, baina zientziak asko ikertu du. Ni meditatzailea naiz, baina horrek ez dit egia ezagutzeko alderdia lasaitzen. Alde horretatik, budismoan egiten diren praktika batzuk hartu, eta zientziaren metodologiatik pasatzen ditugu.

Barne isiltasunarekin lotu daiteke orduan?

Isiltasuna ez da ikuspegi zientifikotik gehien gustatzen zaidan terminoa, apur bat anbiguoa izan daitekeelako. Bakoitzarentzat isiltasuna zer den ikusi beharko zen, baina egia da mindfulness teknikak erroak dituela. Isiltasuna meditazioaren ondorio gisa uler daiteke.

Gaur egun zer behar dago meditaziorako?

Handia. Gaur egun, nahaste psikologikoen aldetik sekulako epidemia daukagu. Antsietatea eta depresioa arazo larriak dira, eta gobernuak oraindik ez dira jabetu horretaz. Azken 50 urtean hamar aldiz ugaritu da gaixotasun horien kopurua. Estres maila ere izugarrizkoa da, arlo teknologikoak ere lagunduta. Beraz, gelditu eta sinpletasunera jotzeak edo lasaitasun puntura itzultzeak onura handiak dakartza.

Kasuak ugaritzen ari direla diozu. Zer egin beharko litzateke horri aurre egiteko?

Hasteko, bi gauza merke: ariketa fisikoa eta meditazioa. Hori esateko oinarri zientifikoak daude. Meditaziorako programa ugari daude, oinarri zientifikoetan oinarrituta.

Teknika horiek zergatik dute halako arrakasta?

Moden atzean zergatiak egon ohi dira. Meditazioa eta isiltasunera jotzeko joeraren atzean gizarteak duen behar izugarria dago. Beharra dauka gelditzeko, sinpletasunera jotzeko eta gauzak ez egiteko. Meditazioa izan daiteke Homosapiens-ak duen jokaera berezienetakoa: eseri eta ezer ez egitean oinarritzen baita. Oso kontrakulturala da, eta, aldi berean, beharrezkoa.

Behar hori sumatzen duzu?

Bai. Nik Baraka psikologia integraleko institutuan egiten dut lan, formakuntzan, eta mindfulness arloa beteta daukagu. Eskaera izugarria da, eta osasun ikuspegi batetik kontuan hartu beharko litzateke. Azkenean, ikusi besterik ez dago nola gabiltzan guztiok ordutegi edo agenda aldetik. Presa handiarekin, eta horrek azkenean nerbio sistemari eragiten dio. Presio handia dago lanean edo beste hainbat arlotan.

Meditazioa errezetatu egin beharko litzateke orduan?

Hori ere iritsiko da. Gaur egun, halako kasuak bidaltzen dizkigute gaiaren inguruan sentsibilizatuta dauden medikuek. Orain ariketa fisikoa errezetatzen den bezala, meditazioa ere aginduko dela iruditzen zait. Ez pertsona guztientzat, baina bai gehienentzat. Horretarako beharra badago.