Eskatu dute bi jaioberrik Osakidetzan izaniko arta «arduragabea» ikertzeko

«Izugarria da». Pazienteen Defendatzailea elkarteko presidente Carmen Floresek atzo hitz horiek erabili zituen Donostiako Ospitalean gertatutakoaren inguruan ezagutu diren albisteei buruzko iritzia emateko. Zabaldu diren datuen arabera, garaia baino lehen jaiotako bi umeri eman beharreko artan akats larri bat gertatu zen erietxe horretan; zunda bidezko arta behar zuten biek, eta, bide horretatik elikagaiak eman beharrean, anestesia motaren bat eman zieten. Oker horrek ondorio larriak izan zituen: biek okerrera egin zuten, umeetako bat hil egin zen, eta besteari kalte larriak eragin dizkio emandako botikak. Pazienteen Defendatzailea elkarteak EAEko fiskal nagusiari eskatu dio ikerketa bat hasteko arta «arduragabe» hori argitzeko. Gertaeraz zabaldu den informazioaren arabera, Osakidetzak berak umetxoen familiei emandako txostenetan onartzen du jaioberriei botikak ematean egin zuten akatsa.

Hala ere, osasun zerbitzuak hedabideei ofizialki ez die deus esan atera diren informazio horien inguruan. BERRIAri esan diote pazienteen gaineko daturik ez dutela inoiz ematen, eta oraingoan ere ez dutela ezer ere adieraziko. Jazoeraren berri eman duen hedabidearen arabera, urtarrilean gertatu zen akatsa, eta zenbait aste bazituzten umeek ordurako; oso pisu gutxirekin jaioak ziren, ordea, eta arta bereziak behar zituzten; horregatik zeuden biak erietxean.

Pazienteen eskubideen kasuak lantzen dituzten hainbat elkarte eta profesionalen arabera, pazienteen %5-%10ek izaten dute ematen dizkieten botiketan errakuntzaren bat, eta, ondorioz, arazoak izaten dituzte hainbatek. Onartu dute, ordea, kasu honen «larritasuna» apartekoa dela; akats handia da, eta ondorio oso larriak eragin ditu. Umeei botikak emateko jarraitu behar ziren «protokoloak» ondo aztertu behar direla adierazi dute, eta horietan oinarrituta ikusi behar dela hanka sartzearen sorburua zein izan zen, erantzukizunak argitze aldera. «Oraindik ere ez dakigu kasu honetan haurrei eman beharreko botiken preskripzioa gaizki eginda zegoen, edo, gero, erizainek egin zuten akatsa», esplikatu zuen atzo Pazienteen Defendatzailea elkarteko ordezkariak. Hainbat hedabidek nabarmendu dutenez, umeon familiek erreklamazioak bidean dituzte jazotakoaren harira; akatsok «zuritzeko erarik» ez dagoela esan dute.

Akatsa onartzea, ezohikoa

Aporcentaje.com abokatu bulegoko ordezkaria da Jorge Fuset; espezializatuta daude osasun sisteman izandako akatsen ondoriozko auzibideetan, eta adierazi du egunean 30-40 kasuren berri izaten dutela. Onartu du, hala ere, halako «larritasuna» duten kasuak ez direla egunerokoak. Ezohikoa da, halaber, osasun sistemak berak hutsegitea onartzea: «Hori ez dugu askotan ikusten». Are, askotan, zer gertatu den argitzeko zailtasunak izaten direla esan du, historia kliniko «aseptikoak» egiten dituztela sarri osasun zerbitzuek, eta auzibideetan aurrera egiteko eragozpen handiak izaten dituztela errakuntzaren baten ondorioz kexu diren pazienteek. «Maiz, zailtasunak ere ipintzen dizkiete historiak lortu ahal izateko», adierazi du. «Onartu bada, oso argia izan beharko du; jazo den hori ezkutatzeko ezingo zen ezer egin kasu honetan».

Fusetek adierazi du biktimek, ororen gainetik, jazotakoaren nolabaiteko «onespena» nahi izaten dutela. «Eta kasu honetan, uste dugu fiskaltzak, atera diren albisteei erreparatuta, ofizioz abiatuko duela ikerketaren bat». Behin hutsegiteak egiaztatuta, osasun sistemen aseguru etxeen gain geratzen da kalte-ordainen gaineko ardura. Abokatuak adierazi du kasu honetan «ardura penalak» ere egon daitezkeela. Protokoloak zergatik ez diren ondo bete argitzera egin behar da; esan duenez, bide horretan «ardura indibidualizatuak» norenak diren argitzea zaila izaten da maiz.