Denzel Washington, guztiz itxuraldatua

Orain dela lau urte, zinema areto gutxi batzuetan oso oharkabean pasatu zen pelikula bikain bat estreinatu zen, Nightcrawler. Jake Gyllenhaal zen istorio horretako protagonista, Los Angelesen (AEB) gertatzen ziren hilketa ugarien argazkiak egiten zituen kazetariaren rolean.

Nightcrawler Dan Gilroy gidoilariak zuzendu zuen lehen lana izan zen, eta erakutsi zuen ongi ikasia zuela urteetan zinemagintzan metatutako esperientzia. Izan ere, pelikula ugariren gidoiak idatzi zituen beste batzuentzat, gehienak akziozkoak, eta, bere garaia iritsia zela erabakita, estreinako harrigarria eskaini zuen.

Orain, berriro bueltan da Gilroy, Roman J. Israel, Esq. pelikula judizialarekin. Eta berriro ere Los Angeles hiria egin du protagonista, baina ez postaletakoa, baizik eta, Nightcrawler-en gertatzen zen bezala, ilunpetan dagoen hori, apenas ezagutzen dena. Hain zuzen ere, Skid Row auzoko epaitegiak bihurtu ditu pelikulako protagonista nagusiak.

Bertan mugitzen da idealez beteriko abokatu beterano bat. 1970eko hamarkada da, eta afro-amerikarren eskubideen aldeko borroka pil-pilean da. Horretan dago engaiatuta protagonista, baina egun batetik bestera lehentasunak aldatuko zaizkio. Haren maisua izan dena hilko da, eta enpresa handi batean hasi beharko du lanean. Bertan ezagutuko duena oso errealitate desberdinada, eta bere idealak non jarri erabaki beharko du.

Akzioa eta konpromisoa

Denzel Washington aktore ezagunak jokatu du Roman Israel J., Esq.-eko rol protagonista, eta, ohi duen bezala, egindako lana txukuna baino txukunagoa izan da. Horren lekuko da aktoreak aurtengo Oscarretarako gizonezko aktore onenaren sarirako izan duen izendapena, pelikulak izan duen bakarra.

Washingtonen ibilbide luzeari erreparatuta, bi multzo nagusitan sailkatzen ahal dira hark egin dituen pelikuletako gehienak. Batetik, arrakasta komertziala helburu duten akzio pelikulak leudeke. Horien artean, The Pelican Brief, Crimson Tide, The Siege, The Bone Collector etaThe Taking of Pelham 1, 2, 3, besteak beste.

Horiekin batera, aldez edo moldez eskubide zibilen aldeko borroka eta bere herriko arrazakeria eta bazterkeria pantailara ekarri duten pelikula garrantzitsu askotan hartu du parte Washingtonek. Esate baterako, Spike Lee zuzendari konprometituarekin behin baino gehiagotan egin izan du lan, besteak beste Malcolm X biografia luzean.

Baina aktorearen lan konprometituen zerrenda ez da mugatzen Leerekin izan duen elkarlanera; hor dira, besteak beste, Norman Jewinsonen The Hurricane, eta baita Fences ere, aktoreak berak duela bi urte egin zuen filma.

'ROMAN J. ISRAEL, ESQ.'

Zuzendaria. Dan Gilroy.

Aktoreak. Denzel Washington, Cloin Farrel, Carmen Ejogo, Selley Hennig, Nazneen Contractor.

Herrialdea. AEB.

Urtea. 2017.

Iraupena. 129 minutu.

Generoa. Drama.

Ostiralean estreinatuko dute Hego Euskal Herrian.