Datorren denboraldian Espainiako Ohorezko Mailan arituko diren hiru euskal taldeen artean, Zubileta Evolution Zuazo bakarrik zegoen oraindik ere oporretan. Baina, atzotik, martxan da Joseba Rodriguez Haito-k zuzentzen duen taldea. Aurreko sasoian ongi jokatu zuen Barakaldoko taldeak, eta beheko postuetatik aldendu zen. Sasoi honetan, txapelketa eredua aldatu dutela kontuan hartuta, helburua argia da: azken lau postuak saihestu, eta kanporaketak jokatzea.
Bost jokalari fitxatu dituzte: Sara Moles eta Ane Valero hegalekoak, eta Andrea Zaldua, Nerea Gil eta Paula Molano albokoak. Molesek, Gilek eta Zalduak esperientzia dute Ohorezko Mailan, Aula Valladoliden, Sant Quirzen eta Bera Beran aritu ziren, hurrenez hurren; Valero eta Molano, berriz, harrobitik datoz, Kukullagatik. «Oso pozik nago fitxatu berriekin. Kalitatezko multzoa osatuko dugu. Uste dut egokitzapena erraza izango dela. Jokalari gazteentzat talde erakargarria gara».
Taldearen bizkarrezurra lehengo berbera da: Mada eta Isi Fernandez-Agusti, Maddi Bengoetxea, Estitxu Berasategi eta Izei Permach, besteak beste.
Ro'Casaren aurka izango dute ligako lehen partida, irailaren 3an. «Denboraldiaurreak beste astebete gehiago irautea nahiko genuke ; motz egiten da». Hain zuzen ere, sei lagunarteko jokatuko dituzte sasoiaurrean. Bera Bera, Beti Onak, Sabadell, Gijon, eta Sporting La Rioja izango dituzte kontrario. Gijonen aurka bi neurketa jokatuko dituzte.
