Lehen azterketen arabera, Donostian ospitaleraturiko andreak ez du ebolarik

Eusko Jaurlaritzako Osasun Sailak atzo jakinarazi duenez, ustez sukar hemorragiko batekin kutsatutako emakume bat artatzen ari dira Donostia ospitalean. Egonkor dago, baina erietxeak abian jarri ditu «segurtasun eta bakartze handiko baliabide bereziak». Donostia ospitaleko Segurtasun Biologiko Handiko Unitatean dago; hara eramaten dituzte eritasun infekzioso larriak dituzten pazienteak. Erietxeko atarian, Xabier Zubeldia medikuak azaldu zuen oraindik ez dutela diagnostikorik: «Zera esan dezakegu: infekzio tropikal bat da. Pazienteari hartutako laginen emaitzen zain gaude». Alarma handia piztu zuen kasuak, baina osagileak esan zuen ez duela «ematen» ebola kasu bat denik.

«Infekzioarengatik, daraman denborarengatik eta egin dizkiogun probengatik, ematen du ez dela ebola kasu bat; Marburg birusaren gaixotasuna ere ez du ematen, edota malaria kasu larri bat. Horiek horrela, lasai gaude, eta gaixoa ere ondo dago». Eritasun larriak dira zerrendatutako horiek, baina zerbait «arinagoa» ere izan daitekeela zehaztu zuen. Emaitzei begiratu beharko zaie, eta pazienteak datozen orduotan duen eboluzioari.

Halakoetarako protokoloa oso sendoa dela nabarmendu zuen Zubeldiak. «Hilero elkartzen gara; anestesista, intentsibista, infektologo eta pediatra taldeak trebatzen gara. Ondo prestatuta gaude». Erietxean, halaber, propio halakoetarako zirkuitu bat prest dutela nabarmendu du. «Esaterako, unitaterako sarbidea zuzenagoa izaten da: larrialdietatik». Hartara, gaitza hedatzeko arriskua txikitzen saiatzen ari dira: «Dena prestatuta dago».

Atzo goizaldean eraman zuten pazientea ospitalera: Urdulizko erietxetik heldu zen Donostiara. Osasun Sailak jakinarazi duenez, Afrika erdialdeko errepublikatik etorri zen duela hilabete, eta, sukar hemorragiko batekin kutsatuta egon daitekeen susmoa dutenez, haren eta hura artatu duten profesionalen bakartzea eta segurtasuna bermatzen ari dira. Osakidetzak 24 orduan baino gutxiagoan abiatu du protokoloa.

Pazienteak gertu izan dituen pertsonen kontrola egite aldera ere, Osakidetzako Osasun Publikoko taldea arduratuko da haiekin harremanetan jartzeaz eta, behar izatekotan, bakartze neurriak ezartzeaz. «Eta gu lasai gaude; ez dago arriskurik herritarrentzat», zehaztu du Zubeldiak.

Garbitzaileak, bueltan

Era berean, Segurtasun Biologiko Handiko Unitatean jarduteko trebakuntza berezia duten garbitzaileek greba etengo dute, eta lanera itzuliko dira, ELAk jakinarazi duenez. Izan ere, sindikatuak atzo ohartarazi zuen Donostia ospitalean ez zegoela halako egoera bati aurre egiteko behar adina garbitzaile prestaturik, eta salatu zuen «hainbat irregulartasun eskaini» zizkietela. ELAko garbitzaileek 95 egun daramatzate greban; LAB, CCOO, UGT eta ESK ere greban daude, beste alde batetik.