Albistea entzun

Alex Petxarroman. Futbolaria

«Realean hazi naiz, eta esker oneko hitzak besterik ez dut»

Realean 11 urteko ibilbidea osatu ondoren, Petxarromanek kluba utziko du. Bigarren taldea mailaz igo ostean, Realari «eskertuta» agertu da donostiarra. Okerrik ezean, Athleticen jokatuko du datozen urteetan.
BERRIA Tamaina handiagoan ikusi

Jon Ander De la Hoz -

2021eko ekainak 10

Aldaketa garaia da Alex Petxarromanentzat (Donostia, 1997). Eskuin hegaleko atzelariak ez du Realean segituko aurrerantzean: hala jakinarazi zuen klub txuri-urdinak joan zen ekainaren 2an. Ordurako, makina batek Athleticekin lotu zuten Petxarroman, eta jokalariak esan du «oso gertu» duela Bilbon jokatzeko aukera. Hori bai, etorkizunak ekarriko dionaren zain, atseden hartzen ari da; baita Reala B-rekin egindako lanaz «gozatzen» ere. Taldea Bigarren Mailan utzita, «oso eskertuta» agertu da Realean bizi izan dituen urte guztiengatik.

Oporretan zaude. Sasoi luzearen ondotik, atseden hartu eta gozatzeko garaia da, ezta?

Bai. Igoera lortuta, are arrazoi gehiago ditugu gozatzeko. Koronabirusaren eta guztiaren ondotik, dena gehiago kostatu da, eta, denboraldi luzea izan den arren, polita ere izan da. Oso pozik nago.

Bigarren mailara igo duzue Reala B. Urtea biribildu duen lorpena izan da?

Bai, noski. Nik esango nuke ezin hobea izan dela: bai pertsonalki, baita taldearengatik ere. Oso talde gaztea genuen, baina langilea. Urte ahaztezina izan da aurtengoa.

Zeintzuk izan dira ligan eta igoera fasean horren ondo aritzeko gakoak?

Hasteko, talde lana esango nuke. Aste guztietan, taldeak lana gogor egiteko asmoa izan du, eta uste dut hori izan dela gako nagusia. Gero, Xabiren [Alonso, entrenatzailea] eskua asko nabaritu da. Uste dut Sanseren [Reala B] jokoa aspaldian ikusitakoa baino hobea izan dela, eta hori ere nabaritu da denboraldiaren amaieran. Zerbait nabarmentzekotan, ordea, lana izango da. Hori, eta talde gaztea izanda erakutsi duen energia. Horrekin guztiarekin geratuko nintzateke.

Taldea mailaz igo da, baina klubak jakinarazi du zuk ez duzula Reala B-n segituko. Zer sentipen eragiten dizu horrek?

Pertsonalki, poza izan dut bidean, txikitatik amestutakoa egia bihurtu delako, baina pena ere bai, amaitu delako. 11 urte egin ditut Realean, eta, ni Realekoa izanda, beti amestu izan dut Realean jokatzearekin. Oraindik ez da ezer ofizial egin, eta ez dakit zer gerta daitekeen, baina egia da oso gertu nagoela Athleticetik, eta bi sentimendu sortzen zaizkit: alde batetik, poza, eta, bestetik, pena.

Athletic ekarri duzu hizpidera. Asko hitz egin da horren inguruan, eta zeuk esan duzu «oso gertu» duzula zuri-gorriekin aritzeko aukera. Abagunea sortu zaizunez, hori probesteko garaia iritsi al zaizu?

Bai, baina esandakoa: oraindik ez dago ezer ofizialik, baina egia da kontaktua aspalditik datorrela. Ea zer gertatzen den. Baina, tira, pozik nago. Realetik atera naizen moduak poza sortzen dit. Azkenean, zerbait historikoa lortu dugu [mailaz igotzea], eta horrek asetzen nau. Egia esan, oso pozik nago.

11 urte egin dituzu Realean. Haurra zinela iritsi zinen, eta bigarren taldean amaitu duzu: bizi oso bat klubean. Azken koska igo ez izanaren penarik ba al duzu?

Bai. Azkenean, haurren mailatik nago hor, eta 11 urte dira. Egia da azken urrats hori egitea oso zaila dela, baina nik uste dut merituak egin ditudala pauso hori emateko. Realean egiteko aukera ez zait sortu, eta beste leku batean bilatu beharko dut. Futbola horrelakoa da batzuetan; egia da pena pixka bat sortzen dizula. Azkenean, urte asko dira, eta ni Realekoa naiz txikitatik. Baina, tira, neure buruarengan pentsatu behar dut, eta uste dut aukera polita dudala aurretik.

Noiz jakin zenuen datorren sasoitik aurrera ez duzula Realean segituko, eta nolatan gertatu da aldaketa hori?

Egia esan, ez nekien nirekin zer gertatuko zen. Azkenean, nire ordezkariak asko hitz egin du Olaberekin [Roberto, futbol zuzendaria] eta kirol zuzendaritzarekin, baina ni albo batera geratu naiz. Nik argi nuen denboraldia hemen amaitu nahi nuela, eta ondo bukatu, gainera. Igoerako kanporaketak genituen aurretik; kristoren erronka zen, eta beste gaietatik apur bat deskonektatuta egon naiz. Nik nahi nuena Bigarren Mailara igotzea zen, eta halaxe gertatu da. Beste gai guztiak ordezkariak eraman ditu, eta ni albo batean geratu naiz.

Lehen Xabi Alonso ekarri duzu hizpidera. Zure agurreko oharrean esker bereziak eman zenizkion. Zer eman dizu entrenatzaileak?

Dena, nik uste. Niri, behintzat, haren izateko erak, lehiatzeko moduak, asko lagundu dit. Hori ere denboraldiaren gakoetako bat izan da. Nik uste hura etorri zenetik eman didan konfiantzak izugarri lagundu didala, eta orain naizen futbolaria izaten lagundu nauela. Aurtengo urtea ahaztezina izan da niretzat. Pentsatu behar dut aurreko denboraldian lesio larri bat izan nuela; nik ere zalantzak nituen nola aterako nintzen lesiotik, nola erantzungo zidan gorputzak. Xabik emandako konfiantzak lagundu dit zalantza horiek uxatzen. Oso eskertuta nago Xabiri, baita Realari ere, eta denei. Oharrean esan nuen: Realean hazi naiz, eta esker oneko hitzak besterik ez ditut denentzat.

Lesio larri bat izan zenuen aurreko sasoian [belauneko lotailu gurutzatua hautsi zuen], baina aurten jarraitutasun handiagoa izan duzu. Jauzi bat eman al duzu?

Argi dago baietz. Pertsonalki, ez nuen espero aurten eman dudan maila ematerik. Ez dakit nola azaldu: lan gogorra egin dut osatze aldi osoan. Sakrifizio handia izan da, eta konpentsatua izan naiz. Baina lesio handi baten aurrean ez da jakiten: 22-23 urte nituen, 23 urtez azpikoen azken urtean nengoen, eta zalantza hori banuen. Pozik nago dena nola atera den ikusita.

Zer eskatzen diozu etorkizunari? Nolakoa aurreikusten duzu orain datorrena? Klubez aldatuko zara, hasteko.

Aurtengo urtearen modukoak izatea eskatzen diot: lesio gutxi izatea, eta futbolean aurrera egiten segitzea. Oraindik gaztea naiz, eta, askotan, ematen du 20 urterekin Lehen Mailan debutatu ez izanagatik ahituta zaudela. Baina nik zera nahi dut: lesiorik ez izan, eta, esan dizudan moduan, futbol arloan aurrera egiten segitu, sekulako aukera izango dudalako aurrerantzean. Hori aprobetxatu nahi dut: anbiziotsua naiz, eta hori lortzea da nire helburua.

Zeuk aipatu duzu aurrerantzean sekulako aukera izango duzula, eta lehentxeago adierazi duzu Athleticen jokatzetik oso gertu zaudela. Hala balitz, zuri-gorrien lehen taldearekin egingo al zenuke datorren denboraldi-aurrea?

Bai. Hori da apur bat hitz egin duguna. Hori bai, esan dizut: oraindik ez dago ezer ofizialik, baina, Realetik aterako banaiz, jada profesionalen mailan aritzeko izango da. Jauzi hori egitea da asmoa; bestela, ez luke zentzu handirik izango.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Jokin Altuna eta Beñat Rezusta, finalerako pilotak aukeratu berritan, atzo, Bilboko Miribilla pilotalekuan. ©MARISOL RAMIREZ / FOKU

Zain egon dira, baina ez geldi

Julen Etxeberria

Jokin Altunak eta Beñat Rezustak azpimarratu dute Iñaki Artolaren erabakiaren zain egon diren arren «egoki» egin dituztela egin beharreko lanak, eta «ondo» iritsiko direla igandeko buruz buruko finalera
Wass eta Thorgan Hazard jauzi betean, bietako nork joko baloia buruz, atzoko partidan. ©WOLFGANG RATTAY / EFE

Artelan lapurtu bat

Aitor Manterola Garate

Danimarkak galdu egin du Belgikaren aurka (1-2), sekulako jokoa egin arren. Historia errepikatu da: ikusgarri bai, baina irabazi ezin

Iragan urtean Getarian jokatutako ETE ligako estropada. Bihar ekingo zaio aurtengo sasoiari, Pasai San Pedron. ©GORKA PEÑAGARIKANO

Olatu zulotik olatu gainera

Jon Ander De la Hoz

Tolosaldeak eta Zarautzek bihar hasiko dute ETE liga. Tolosarrak txapeldun izan ziren iaz, eta xede bera dute aurten. 'Enbata' berriz uretaratuko da, eten baten ostean.

Iñaki Artola eta Iñigo Simon medikua, atzo, Mikel Sanchezek Gasteizen duen kontsultatik irten berritan. ©JAIZKI FONTANEDA / FOKU

«Indartuta irtengo naiz»

Julen Etxeberria

Iñaki Artola ez da osatu, eta uko egin dio igande honetan buruz buruko finala jokatzeari. Beñat Rezusta ariko da haren ordez, Jokin Altunaren aurka

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna