Erremonteaz gozatzeko eta erremontearen ingurukoak jakiteko aukera emango du astelehenetik aurrera ETB1ek, Erremontari saioaren bitartez. Astelehenero 22:15ean emango dute. Sagardoaren txapelketa izango du ardatz saio horrek. Sei bikote arituko dira lehian, eta bakoitzak sagardotegi bat ordezkatuko du: Etxarri-Barrenetxea IV.a (Oialume zar), Segurola-Larrañaga (Gaztañaga), Ansa II.a-Labaka (Setien), Urriza-Zaldua (Bereziartua), Juanenea-Zubiri (Larre-gain) eta Goikoetxea-Aizpuru III.a (Gurutzeta).
Bederatzi jardunaldi jokatuko dituzte; astero, bi partida. Lehenengo emanaldian, bi neurketa hauek izango dira ikusgai: Urriza-Zaldua / Etxarri-Barrenetxea IV eta Ansa II-Labaka / Juanenea-Zubiri.
Iñigo Aiestaran izango da saioaren gidaria. Manuel Arrizabalaga Matxin eta Iñaki Agirre Gaztelu izango ditu alboan, txandakatuz, partiden kontakizuna egiteko. Elena Azpeitia arduratuko da elkarrizketak egiteaz.
Kamerak kaskoetan eta beste toki estrategiko batzuetan jarrita, pilotalekura joan ezina ordezkatuko du Erremontari saioak. Hernaniko (Gipuzkoa) Galarretan grabatuko dituzte saioak. Teknologia berriez baliatuko dira saioa erakargarriagoa egiteko.
ETB1ek 'Erremontari' saioa emango du astelehen gauetan
Iruzkinak
Ez dago iruzkinik
Ordenatu