Albistea entzun

Irene Paredes. Bartzelonako jokalaria

«Gauzak oso ondo egin beharko ditugu partida irabazteko»

Bost urte PSGn egin ondoren, Bartzelonak fitxatu du Paredes erdiko atzelaria. Taldearen asmoa dena irabaztea dela dio, eta horretarako ari direla lanean. Kontrario «zaila» izango dute gaur aurrean: Reala.
PACO LARGO / BARTZELONA Tamaina handiagoan ikusi

Jone Bastida Alzuru -

2021eko urriak 31

Entrenamendua amaituta, tarte bat hartu du Irene Paredesek (Legazpi, Gipuzkoa, 1991) galderei erantzuteko. Bartzelonarekin fitxatu du aurten, eta «gustura» dabilela nabarmendu du. Jokalari bikainak ditu Kataluniako taldeak, eta geldiezin dabil, aise. Lider da Espainiako Lehen Mailan, eta Txapeldunen Ligan jokatutako neurketa guztiak irabazi ditu. Denboraldi hasiera aparta egiten ari den aurkari bat izango du gaur: Reala. Levanteren kontrako azken neurketa galdu arren, lehen sei jardunaldiak erreskadan irabazi zituen talde txuri-urdinak, eta bigarren postuan helduko dio lehiari; 12:00etan hasiko da norgehiagoka. Natalia Arroyo Realeko teknikariak «ilusioarekin» daudela adierazi du.

PSGn bost denboraldi egin ondoren, Bartzelonak fitxatu zaitu. Gustura zaude?

Bai, oso. Azkenean, aldaketak hobetzeko ideiarekin egiten ditut, eta orain ere hala izan da. Oraingoz ondo doa, eta oso gustura nago.

Zerk harrarazi zizun erabaki hori?

Gauza batek baino gehiagok. Bost urte egin nituen han [Parisen], eta aldatzeko gogoa nuen; proiektu bat baino gehiago mahai gainean izanda, Bartzelonakoa oso interesgarria iruditu zitzaidan. Gainera, jende asko ezagutzen nuen aurretik. Haien esperientziak eta ideiak kontatzean argi ikusi nuen. Apustua ere bada. Onenekin entrenatzen naiz, eta gertatu daiteke gutxiago jokatzea edo. Gustura nago egindako aukerarekin.

Espero zenuena topatu duzu?

Bai. Proiektu serio batean sartu nahi nuen, egindako proiektu batean. Detaile guztiak landu eta neskek indarra duten klub batera joan nahi nuen. Eta horiek guztiak betetzen ditu Bartzelonak.

PSGk eta Bartzelonak ez dute jokatzeko modu bera. Estilora egokitzen ari zara?

Bai, horretan ari naiz. Esan bezala, aurrez taldekide asko ezagutzen nituen Espainiako selekziotik. Eta haiekin estilo honetan jokatu izan dut. Oraindik, ordea, denbora behar dut guztiz egokitzeko.

Zure ezaugarriekin ondo datorkizu jokatzeko modu hau?

Uste dut baietz. Aukera dut zenbait estilotan jokatzeko, eta moldatzen ari naiz. Oraindik gauza asko daude lantzeko, baina badoa, pixkanaka.

Zein dira taldearen helburuak?

Dena irabaztea. Horrela da, eta horretarako egiten dugu egunero lan. Jokoan dauden titulu denak irabazi nahi ditugu. Erraza da hori esatea, baina lan asko egin behar da egunerokoan. Detaile asko zaindu behar dira, hobetu, eta horretan ari gara.

UEFAk 2020-2021eko denboraldiko Txapeldunen Ligako atzelaririk onena izendatu zintuen. Ilusioa egin zizun?

Bai. Ez nuen espero, eta horrelako gauzek ilusioa egiten dute. Atezainik, erdilaririk eta aurrelaririk onenarekin entrenatzen naiz orain egunero, eta hori oso gogoan dut; horrek hobea egiten zaitu. Horrek egiten dit ilusio handiena.

Urrezko baloia lortzeko hautagaien artean ere bazaude.

Bai. Oso zaila da hor egotea, eta eskertzen da halako zerrendetan sartzea, baina tira. Badakit oso zaila dela; jende oso ona dago. Pozten nau, baina jarraitu egin behar da.

Zure ibilbideko onenean zaudela esango zenuke?

Baliteke; ez dakit. Urte asko daramatzat oso gustura. Orain aldaketa momentu bat da, eta ondo doa. Garai oso ona da, baina espero dut hobeak etortzea. Garrantzitsuena gozatzen segitzea da. Ez baduzu gozatzen, ez du merezi.

Zure moduko jokalari batek zertan hobetu dezake?

Beti daude hobetzeko gauzak. Batekin eta bestearekin entrenatuz eta jokatuz gero, gehiago hazten zara. Dena hobetu behar da.

Igandean, Realaren kontra jokatuko duzue. Partida berezia da zuretzat?

Bai. Aspaldi da ez dudala haren aurka jokatzen, baina ezagutzen ditut jokalari batzuk. Azkenean, nire gertuko taldea izan da, eta beti izaten da berezia. Baina hori alde batera uzten dut. Hemendik ikusten duguna da lehenengoak bigarrenaren aurka jokatzen duela, egundoko partida izango dela, eta gauzak oso ondo egin beharko ditugula irabazteko.

Nola ikusten dituzu txuri-urdinak?

Oso ondo. Gauzak oso ondo egiten ari dira. Ez bakarrik aurten: azken urteetan pixkanaka hobetuz joan dira. Ez da kasualitatea bigarren postuan egotea. Lana ondo egiten ari dira, eta gauzak oso ondo egin beharko ditugu irabazteko. Haiek ere saiatzen dira baloia izaten eta baloiarekin asko jokatzen, gu bezala. Lehia polita egongo da. Baina beste detaile asko ere badaude. Aste guztian horiek landuko ditugu, ahalik eta ondoena egoteko.

Realean zer nabarmenduko zenuke?

Gauza asko egiten dituzte ondo. Jokatzeko era ere desberdina da. Eta badituzte Nerea [Eizagirre] eta Amaiur [Sarriegi] bezalako jokalariak kalitate puntu hori ematen dietenak. Uste dut haiek direla arriskutsuenak.

Uste duzu gauzak zail jarriko dizkizuela?

Bai. Ez datoz hona berdintzera edo porrota onartzera, baizik irabaztera. Gauzak badituzte horretarako, eta neurketa zaila izango da.

Egun, Bartzelona ligako beste taldeen gainetik dago, nabarmen. Emaitzak erreparatu besterik ez dago hori ikusteko. Emakumezkoen futbolarentzat hori ona dela uste duzu?

Azken aldian asko errepikatzen da galdera hori. Nire ustez, oso ona da. Badirudi txarra dela Bartzelonak halako lana egitea. Behar dena da beste guztiak maila honetara iristen saiatzea. Orduan, Bartzelona eredu gisa hartu behar da, ez mehatxu gisa.

Irailean ama izan zinen. Pozik?

Bai, noski. Pertsonalki ere etapa berria da. Oso pozik gaude. Dena ondo doa, eta horrela jarrai dezala.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Beti Onakeko jokalariak Arrecifen (Espainia), asteburuan jokatu duten igoera fasean. ©Beti Onak

Gurpea Beti Onak Ohorezko Mailara igo da estreinakoz

Paulo Ostolaza

Asteburu honetan jokatu dute igoera fasea Arrecifen (Espainia), eta lehen bi neurketak irabazita lortu dute igoera. Datorren urtean hiru euskal talde arituko dira lehen mailan.

Eibarreko jokalariak, atzo, garaipena ospatzen. ©Jaizki Fontaneda / Foku

Eibarrek ez du huts egin, baina oraindik ez du igoera ziurtatu

Aitor Manterola Garate - Paulo Ostolaza

Teneriferi irabazi dio bart Ipuruan, baina Valladolidek ere irabazi egin duenez, azken jardunaldira arte itxaron beharko dute Lehen Mailara itzultzeko. Reala B eta Amorebieta jaitsi egin dira.

Amandine Henry Lyoneko jokalaria, berak sarturiko partida lehen gola ospatzen, atzo Turinen. ©KIKO HUESCA/ EFE

Berea egin, eta besteari utzi ez

Aitor Manterola Garate

Olympique Lyonek zortzigarren aldiz irabazi du Txapeldunen Liga, Bartzelona gainditu eta gero Turineko finalean (1-3). Damaris Egurrola da lehen euskal emakumezkoa txapelketa irabazten

Athleticeko jokalariak Lezaman, lan saio batean, Marcelinoren azalpenak entzuten. ©MIGUEL TOÑA / EFE

Europa, ospakizuna, eta agurrak

Haritz Gallastegi

Athleticek Vila-Realen emaitza hobetu beharko du Conference ligan jokatzeko. Realak, Osasunak eta Alavesek ez dute ezer jokoan

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...