Noiz sortua: 2018-08-09 00:30:00

Arrauna. Euskotren liga. Maria Mendizabal. San Juaneko arraunlaria

«Irabazteko goseari eustea da gakoa, eta gu gose gara oraindik»

Mendizabalek laugarren denboraldia du Batelerekin, eta taldearen aro bikaina ari da bizitzen. Hiru aldiz irabazi ditu liga eta Kontxako Bandera, eta bata zein bestea laugarrenez irabazteko aukera asko dauzka aurten.
JON URBE / FOKU Tamaina handiagoan ikusi

Aitor Manterola -

2018ko abuztuak 9

Handia da turisten joan-etorria Donostiako portu inguruan, eta asko ari dira zeharkatzen Portaleta, Alde Zaharrerako atea. Handik azaldu da Maria Mendizabal, San Juango arraunlaria (Donostia, 1991). Hemendik aste batzuetara, turistak baino gehiago, arraunzale eta apustuzaleak ibiliko dira leku horretan, Kontxako Banderaren aitzakian dirua jokatzen.

Apustu lekua izanik hau, eta Kontxako Bandera gertu dagoenez, San Juanen aurka jokatuko da dirurik estropada garrantzitsuenean?

Orain artekoa ikusita, dena gure alde dago, baina denetarik gerta liteke. Garbi dut, gure taldea nolakoa den jakinda, indar bereziarekin aterako garela Kontxa irabaztera.

Ba al dago irabaztera ohitzerik?

Beti nahi izaten da gehiago. Gakoa da irabazteko goseari eustea, eta gu gose gara oraindik.

Askotan irabazten ari denak izaten du arriskua erlaxatzeko ere, nahigabe bada ere. Izan duzue taldean horrelakorik denboraldi honetan?

Egon dira une batzuk, baina inkontzienteki sortuak, ez harrokeriagatik edo nahita erlaxatzeagatik. Estropadaren batean edo bestean atera izan gara lasaiago, gure lana ondo egiteko arreta pixka bat galduta. Estropada bakan horietan, eta irabazi arren, ez gara gustura irten uretatik, ez baitugu gure maila eman.

Aldi berean, exigentzia maila horrek ematen dizue indarra aurrera serio jarraitzeko, ezta?

Bai, hurrengo egunean lana hobeto egiteko indarra ematen digu.

Zer dauka San Juanek beste taldeek ez dutena?

Guk geure buruari asko eskatzen diogu; bakoitzak badakigu zein diren gure betebeharrak eta lana, zein gure mugak, eta lana oso serio egiten dugu. Entrenatzailea falta izan den egunetan ere berdin entrenatzen dugu, seriotasun berarekin. Beti gaude irabazteko gosearekin, eta asko haserretzen gara geure buruarekin gauzak ondo egiten ez ditugunean. Bakoitzak oso argi dauzkagu helburuak, eta konfiantza handia daukagu talde gisa, beti ari gara pentsatzen gauzak ondo egingo ditugula.

Lanerako kultura ondo barneratua daukazuela ari zara kontatzen, ezta?

Hori da. Entrenatzaileak ez dauka gure gainean egon beharrik lanak kalitatea izan dezan. Taldearen maila handia izanik, gure artean lehia sanoa dago titular izateko, eta horrek indartu egiten gaitu.

Eredugarri zarete lan egiteko moduan?

Beste talde batzuetan ere lan ona egingo dute, baina gurean badira arraunlari oso eredugarriak lanean, beti onenaren bila dabiltzanak.

Eusko Label ligako arraunlari batek esandakoa da San Juango emakumezkoen taldeak gizonezkoen hainbatek baino gehiago entrenatzen duzuela.

Besteek zer egiten duten ez dakit, baina gure artean aipatu izan dugu erdi txantxetan gutxi geratzen zaigula gizonen traineruekin lehian hasteko.

Entrenatzen duzuen bezala entrenatu gabe, eta bakarrik arraunlarien kalitatearekin, orain bezalako emaitza onak lortuko zenituzkete?

Prestaketa oso garrantzitsua da, eta, gutxi eginda, gauzak ezin dira ondo atera. Baina uste dut gaizki entrenatuta ere lortuko genituela emaitza onak, badelako taldean izaera lehiakor berezi bat. Hala ere, oso garbi daukat neguko lana oinarri ezinbestekoa dela gero udan ondo lehiatzeko.

Aurten, gainera, estropada gehiago dituzue Euskotren ligan. Zer iruditu aldaketa?

Gustatu zait. Hasieran bagenuen kezka puntu bat, ea nola egingo genion aurre, baina ondo gabiltza.

Bukatzen ari da zuen liga; lau estropada falta zaizkizue amaierara heltzeko, eta datorren igandean titulua irabazteko aukera duzue, Hondarribian.

Asteburuko bi estropadak irabazi behar ditugu horretarako, baina bestela ere nahiko bideratua daukagu.

Baina historikoa litzateke ligako estropada guztiak irabaztea.

Bai. Hori ere hor daukagu, eta bada gure helburua. Gauden lekuan egonda, hori lortu nahi dugu. Hala ere, ez erdiesteak ez luke gure lana itsustuko.

San Juanek badauka tartea sasoi puntuan beste estutu bat emateko ?

Baietz esango nuke. Helburua beti izaten da Kontxara puntu-puntuan heltzea.

Liga bukatu eta 11 egun egongo zarete lehiatu gabe Kontxarako sailkatze estropada baino lehen. Ez lehiatzeak kezkatzen al zaitu?

Gustatzen zaigu lehiatzea, baina atsedenak ez digu txarrerako eragingo. Gainera, Kontxako Banderak hau du ona: osteguneko sailkatze estropada oso gertu dagoela lehen igandetik, eta oso baliagarria eta lagungarria izaten da bizitasunari eusteko.

Orio gertu daukazue azkenaldian, eta jakina da Kontxako Bandera zer den oriotarrentzat, iaz gizonezkoekin ikusi zen bezala. Arduratzen zaitu horrek?

Denboraldi handia ari da egiten; ondoan dauzkagu, eta badute gosea irabazteko. Horrek indarra ematen die. Edozein egunetan izan daiteke bandera bat haientzat, eta Oriorekin erne ibili behar dugu Kontxan. Guk gurea egiten segitu behar dugu.

San Juanen aro bikain hau amaitzetik gero eta gertuago dago?

Urte askoan dabiltza arraunlari asko, eta urtetik urtera gehiago kostatzen da berriz hastea. Bestalde, azken urteetan egiten ari garena oso handia da, eta indarra ematen du aurrera jarraitzeko. Baina kontu eta erabaki horiek udazkenekoak dira, eta ez dakit zer gertatuko den. Iaz ere entzun ziren gauza batzuk, baina hemen segitzen dugu. Ezin da esan zer gertatuko den.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Ekainaren 1ean eguneratua, 19:00etan. ©BERRIA

Koronabirusaren azken datuak

Berria

Azkeneko 24 orduetan ez da inor hil COVID-19 gaitzaren eraginez. Bost positibo atzeman dituzte PCR probekin, eta 11 gaixo ospitaleratu dituzte. Euskal Herrian 29.309 gaixok eman dute positibo guztira, koronabirusa atzemateko probaren bat eginda. Horietatik 2.066 hil dira. Grafikoak, albiste barruan.

Guardia bat pertsona bezero bati tenperatura hartzen, saltoki baten sarreran, Panama Hirian. ©Bienvenido Velasco / EFE

Munduan sei milioi pertsona baino gehiago kutsatu ditu birusak

Berria

375.000 pertsona hil dira COVID-19aren eraginez. Horien artean 105.000, Ameriketako Estatu Batuetan.

Gallartako agerraldiaren irudia, Josu Erkorekaren Twitter kontuan agertua ©@Jerkoreka

Urkulluk Euskal Herri osoan ibiltzea baimentzeko eskatu die Frantziari eta Espainiari

Gotzon Hermosilla

Jaurlaritzak espero du Araba, Bizkaia eta Gipuzkoa hirugarren fasera pasatuko direla astelehenetik aurrera.

Espaniako Poliziak, Iruñean, 2018an, protesta batean parte hartzen ari zirenak kolpatzen. ©Jagoba Manterola / Foku

Borrak eta armak erabilera bakoitzaren ondoren desinfektatzeko agindu die Madrilek poliziei

Berria

Herritar bati nortasun agiria eskatuz gero, hura haren eskuetatik ez hartzeko esan diete agenteei.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna