«Baietz, baleike!»

'Baleike' Zumaiako herri komunikabideak 25 urte bete ditu aurten. Internet Euskal Herrian zabalduta egon aurretik hasi zen, baina orain batez ere sareari begira bizi da.
<em>Baleike</em> aldizkariko Felix Aizpurua, Juan Luis Romatet eta Maria Maya Manterola, atzo, hilabetekaria aterpetzen duen Foronda jauregian.
Baleike aldizkariko Felix Aizpurua, Juan Luis Romatet eta Maria Maya Manterola, atzo, hilabetekaria aterpetzen duen Foronda jauregian. JUAN CARLOS RUIZ / FOKU

Edu Lartzanguren -

2019ko uztailak 4
Geuk ere ez genuen uste horrenbeste iraungo genuenik», esan du Juan Luis Romatet kazetariak. «Imajinatu: lehen urtebetetzea ere ospatu genuen, ez genekielako ziur bigarrena egongo ote zen». Zumaiako (Gipuzkoa) Baleike hedabidearen zuzendaria da Romatet; aurten, 25. urteurrena ospatzen ari dira.

Bigarren zenbakitik egon da Romatet aldizkarian, 1994ko uztailetik, alegia, nahiz eta tarteka beste gauza batzuetan aritzeko utzi duen. Aldizkaria «ikaragarri» aldatu da urteotan, Romateten arabera. Horren erakusgarri da Baleike-ko kazetari Gorka Zabaletak hemerotekatik berriki atera duen harribitxi bat: 1997an Internet zer ote zen galdezka ibili ziren kale inkesta batean. «Erantzunak mundialak dira», idatzi du Zabaletak. Elkarrizketaturiko lagun gehienentzat gauza arrotz samarra zen orduan Internet. «Ez dakit ondo zer den, baina bizitza konplikatzeko katxarroren bat izango da, ordenadoreak bezalakoa», erantzun zuen horietako batek. «Badakit linea bat dela, gauzak jakiteko ibiltzen dena», beste batek. Aldizkaria bera ere Interneten aroa gailendu aurrekoa da. 1,4 megabyteko disketetan eramaten zuten inprimategira, autoz, Romatetk kontatu duenez. «Lan egiteko modua erabat aldatu da. Onerako».

Gazte Batzordeak sortu zuen aldizkaria, eta gazteei loturiko gaiak lantzen zituen orduan: intsumisioa, sexualitatea, drogak. «Komiki atal bat ere bazuen», adierazi du Romatetek. «Esan daiteke freskoagoa zela orduan».

Plataforma digitala

Webgunea 2004an sortu zuten. «Albisteak sartzen genituen, bai, baina lehentasuna paperak zeukan». Badira urteak, ordea, batez ere Interneti begira ari direla. Edonola ere, ez dute papera ahaztu, eta bihar bertan bidaliko dute inprimategira uztaileko Baleike. «Gaur, ez da egunik pasatzen webgunean albisterik sartu gabe; ez dugu jai egunik hartzen, egunerokotasun horri eutsi behar zaiolako».

Aldizkariak hainbat sari jaso ditu. Zumaiako informazio lokala paperean eta Interneten uztartzeko egindako lanagatik Rikardo Arregi Kazetaritza saria eman zioten 2010. urtean: «Herritarrei gehien axola zaiena gertuko informazioa da», esan zuen saria jasotzean orduko zuzendari Zabaletak. Tokikom euskarazko tokiko komunikabideen koordinadorak ikus-entzunezkorik onenaren saria eman zien 2017an, Tapa-Pala bideo sortarengatik. Bi urtez jarraian egin zituzten bideoak, Felix Aizpuruak bultzatuta, «haren pasio handia arrauna delako», Romatetek azaldu duenez. Arraunaren inguruko lanak egiten zituzten, baina barrutik: patroi batek zer lan egiten duen azaltzeko, estropuak nola egiten diren... «Bideo txikiak ziren, ikusten ez diren gauzen inguruan, eta jendeak gustura hartu zituen».

Baleiketarrek joan zen astean egin zituzten ospakizunak: erakusketa bat jarri zuten Zumaiako Alondegian, eta kontzertu bat antolatu zuten. Baina bihar lantaldeak afari batekin amaituko ditu ekitaldiak: «25 urte egin ditugu. Ikusi da baietz, baleike!». Duela lau urte, handikiro ospatu zuten 20. urteurrena. 25.a apalago ospatzea erabaki dute. Izan ere, argiago ikusten da, lehen urte hartan ez bezala, Baleike-k beste urteurren asko izango dituela.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna