Albistea entzun

Beñat Erezuma. Teknologia irakaslea

«Hemengo irrati batzuk hasiak dira jolasten adimen artifizialarekin»

Adimen artifizialarekin narrazioak sortu, eta horiek 'Zero eta bat' podcastera eramaten ditu Erezumak. Gaur sareratuko du hirugarren atala. «Esperimentatzen jarraituko dut».
MARISOL RAMIREZ / FOKU Tamaina handiagoan ikusi

Urtzi Urkizu -

2022ko azaroak 29

Ingeniaria da ikasketaz Beñat Erezuma (Getxo, Bizkaia, 1981), eta Berritzegune Nagusian egiten du lan.

Zerk bultzatu zaitu Zero eta bat podcasta sortzera?

Azken urteotan, podcast asko kontsumitu ditut. Horrez gain, adimen artifizialarekin jolasten ari naiz azkeneko urtean; hasieran, testu sorkuntzan aritu naiz, eta gero, irudiekin. Bi gaiak gurutzatu ziren, eta pentsatu nuen proiektu txiki honetan podcasten mundua eta adimen artifiziala nahastea.

Nola gauzatzen duzu testuak sortzeko prozesua?

Erabiltzen ari naizen teknologia GPT-3 da, Artiadi olerki liburua sortzeko erabili nuen bera. Lehen esaldi batekin proposamena egiten diot tresnari. «Sortu ezazu narrazio baten lehen atala», eskatzen diot. Testua sortzen dizu, eta gustura baldin bazaude, bigarren atala egiteko eskatzen diozu. Batzuetan, moldaketa txikiren bat egiten dut. Hirugarren atalerako, beste teknologia bat erabili dut: Novelai.net.

Zertan da desberdina hirugarrena aurreko bietatik?

Sortzeko garaian, testuak luzeagoak izan daitezke. GPT-3 teknologian oinarrituta dago, baina propio prestatuta dago istorioak eta kontakizunak sortzeko.

Podcasta zure webgunean, Spotifyn eta Youtuben entzun daiteke. Youtuben, azpidatziak zortzi hizkuntzatan jarri dituzu. Erraza al da azken hori egitea?

Bai, oso erraza da. Gidoia baldin baduzu, Youtubek berak badauka azpidatziak igotzeko aukera bat, eta tranpa txiki bat egin behar da euskarazko testuekin, baina erraza da gauzatzea. Gero, euskarazko azpidatziak dauzkazunean, segundotako kontua da beste hizkuntzetara itzultzea.

Hain erraza izanik, nola ez dira gehiago baliatzen azpidatziak?

Nire iritziz, azpidatziak baliatu beharko lirateke ETB2n: audioa euskaraz emititu, eta nahi duenak azpidatziak erabil ditzala, gaztelaniaz edo frantsesez. Teknologia ez da arazoa. Ondorioa da erabaki politiko bat dagoela hor.

Iruditzen zaizu Euskal Herriko irratiak hasiko direla halako saiakerak egiten?

Badakit Euskal Herrian bertan irrati batzuk hasiak direla adimen artifizialarekin jolasten. Agian entzuleria zabalak ez du jakingo, baina horrela da. Zer esanik ez nazioartean. Horretan ari dira.

Irratiren batek zure podcasta eman nahiko balu, zer baldintza jarriko zenioke?

Creative Commons izatea, besterik ez. Jatorria aipatzea.

Gogoz zaude halako saiakerekin jarraitzeko?

Bai. Gainera, hilabete gutxiren buruan GPT-4 kaleratuko dute. Irrikan nago hori probatzeko, zeren, esaten dutenagatik, 500 aldiz parametro gehiago erabiliko dituzte. Adimen artifizial osatuagoa izango da, beraz, GPT-3 baino.

Zer aukera emango ditu horrek?

Ez dakit, inork ezin du esan. Baina sumatzen da sekulakoa izango dela.

Irudiekin ere ari zara. Podcasteko atalen irudiak teknologia horrekin sortu dituzu, ezta?

Bai, adimen artifiziala erabili dut horretarako ere. Koloretakoak ziren jatorrizko irudiak, eta zuri-beltzean jartzea erabaki dut. Filtro baten bidez, gris eskala batean jarri ditut irudi horiek.

Bideo kontuetan nolako aurrerapenak daude?

Aste gutxiren buruan, bideo sorkuntzan iraultza ederra etorriko da adimen artifizialaren alorrean.

Film laburrak egiteari ekingo al diozu orduan?

Ez. Esperimentatzen saiatuko naiz, baina profesionalak direnek bide emango diote horri.

Irulegiko Eskuarekin egin duzu esperimentu txikiren bat.

Bai, nire asmoa jolasten ibiltzea da beti, eta euskal komunitatean horrelako proiektuak sortzea. Irulegiko Eskuarena aukera ederra zen irudien bidez jolasteko.

Euskaraz ikasteko bideoekin Euskara Satorra kanala sortu zenuen Youtuben. Baditu jarraitzaileak oraindik?

2016an hasi nuen, eta aurtengo martxoan eman diot amaiera. Bideoak sortzeak denbora dezente behar du, eta utzia dut. Harritzekoa da bideoek egunean mila ikustaldi izatea, eta podcastak egunero 300 entzunaldi. Horrek esan nahi du eskaera eta premia badagoela.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©GORKA RUBIO / FOKU

«Bortxaketa salatzeko erabili dut musika»

Ane Insausti Barandiaran

'Medusa' izeneko EPa sortu du AyVeek, jasan zuen bortxaketa eta ondoren bizi izandakoak kontatzeko. Haren hitza zalantzan jarri zutela salatu du, eta ingurukoen babesari esker egin duela aurrera.
Lurraren barneko geruzak eta barne nukleoa. ©ARGONNE NATIONAL LABORATORY

Lurraren barrunbeak ezagutzen

Iker Tubia

Lurraren barneko prozesuen berri izateko, uhin sismikoak erabiltzen dira. Berriki, ikerketa batek erakutsi du nukleo solidoaren abiadura moteldu egin dela, eta agerian utzi du mantuaren eta nukleo solidoaren arteko abiadura aldea.
ETB1eko <em>Go!azen</em> telesaileko aktore gazteak. ©ETB

Hiru haurretik batek ikusi du aurten 'Go!azen' ostiraletan ETBn

Urtzi Urkizu

ETB1eko telesailaren denboraldia gaur amaituko da. Kontzertuek maiatzera arte jarraituko dute

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.