Albistea entzun

Xose Castro. Itzultzailea eta gidoilaria

«Iragarkietan hizkera egokiak garrantzia hartu du berriz ere»

Publizitatearen bide berrien inguruan hitz egin du Castrok EHUren udako ikastaroetan, Bilbon. Nabarmendu du erredakzio zuzena erabiltzea eta emozioei heltzea funtsezkoa dela sarean.
JUNE PRIETO / FOKU Tamaina handiagoan ikusi

Urtzi Urkizu -

2018ko ekainak 28

SER eta RNE irratietan eta La2 telebista katean kolaborazio finkoak egiten ditu Xose Castrok (Coruña, Galizia, 1968). Community manager eta argazkilari lanetan ere aritzen da, eta erredakzio ikastaro ugari eman ditu azkenaldian Latinoamerikan.

Publizitateaz aritu zara Bilbon, udako ikastaroetan. Mundu digitalak zein aldaketa nagusi ekarri ditu?

Gaur egun, herritarron arreta ahalmena txikiagoa da, eta, ondorioz, mezuak laburragoak eta zehatzagoak dira. Publizitate digitalean prentsa tradizionalean baino gehiago egiten zaie erreferentzia emozioei. Umorea ere gehiago erabiltzen da. Digitalean, erredakzio zuzena oso garrantzitsua da. Nahiz eta ikus-entzunezkoek pisu handia duten, internautek denbora asko pasatzen dute irakurtzen, eta hizkera egokiak garrantzia hartu du berriz ere. Zenbait kanpainak porrot egin dute erredakzio akatsak izan dituztelako. Akatsak oso bizkor zabaltzen dira, gainera.

Ez al ditu telebistako publizitateak oraindik ere diru sarrera handienak bereganatzen?

Bai, baina digitalean egiten den inbertsioa sekulakoa da, eta gero eta handiagoa. Enpresa txiki eta ertainentzat merkeagoa da publizitatea Interneten egitea, eta kantitate aldetik sektore batzuetan publizitate digitala nagusi bilakatu da, eta papera gainditu du. Era berean, sakelakoen formatura egokitu behar dira publizitateko mezuak. Telebistari dagokionez, kontzeptua aldatuz doa, beste pantaila batzuetan ikusten delako orain; zenbait iragarki telebistarako dira, baina ordenagailu batean ikusteko pentsatuak.

Zer izan behar du iragarki batek iragarleak bere helburuak bete ditzan?

Hori ez da askorik aldatu. Ez du desilusionatu behar. Esaldi batek dio: «Zure produktua txarra bada, egin dezakezun gauzarik okerrena da ona balitz moduan saltzea». Ezin da eroslea engainatu. Gaur egun, gainera, kontsumitzaileen iritzi asko daude sarean. Lehen, zerbait txarra erosi, eta lagunei esaten zenien. Baina, egun, iritzi horrek zabalpen handia izan dezake sare sozialen bidez. Gaurko beste premisa on bat da kontsumitzaileei denborarik ez galaraztea. Ahalik eta klik gutxienekin erosi behar da produktua.

Zer herrialdetan egiten da publizitaterik hoberena?

AEB oso aurretik doa, lehen kanpaina handiak han egin zituztelako. Baina Argentinako publizistak nazioarteko sari asko ari dira jasotzen. Gure inguruan, Toni Segarra kataluniarrak kanpaina oso arrakastatsuak sortu ditu; sari ugari jaso ditu. Espainian publizitatearen maila handia da.

Zaila al da iragarki bat hizkuntza batetik bestera itzultzea?

Egun, sarri transkreazio kontzeptua erabiltzen da: itzulpen baten eta sorkuntza baten arteko nahasketa litzateke. Gakoa emozioak transmititzea da. Zenbait produktu ezagunek tokiko emozioak ukitzen dituzte, herrialdearen arabera. Ezberdina da herrialde bakoitzaren egoera, eta iragarkia berriro pentsatzea da gakoa.

Komunitate kudeatzaile edo community manager lanetan aritzen zara. Zein da sekretua lan hori ondo egiteko?

Community manager baten profilak lotura handia dauka bezeroaren arretarekin. Testu argiak, zehatzak eta zuzenak idazten jakitea funtsezkoa da. Kanpainen arrakasta neurtu behar izaten da. Jendeak zure markarekin konfiantza izatea lortu behar duzu. Markaren tonuarekin bat egin behar du community manager-ak.

Kazetaritza testuak Interneten idazteko orduan, zer hartu behar da aintzat?

Googlek erabaki du hizki lodiz doazen hitzak eta esaldiak oso garrantzitsuak direla, eta beste modu batean jasotzen ditu. Interneteko erredaktoreek hizki lodia erabiltzen ikasi behar dute.

Zer esango zenuke galegoz argitaratzen diren hedabideez?

Luzes izeneko kultur aldizkari bat dago formatu digitalean primeran funtzionatzen ari dena. Itxaropena dut Interneten hedabide interesgarriak sortuko direla hizkuntza gutxituetan. Filipinetako chavacano hizkuntzan egindako edukiak deskubritu ditut berriki. Hedabide digitalak anplifikadore ederrak izan daitezke hizkuntza gutxitu askorentzat.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Artemis I misioko 'Orion' ontzia. ©@NASA_Johnson

Artemis I misioa espero baino «harago» doa

Julen Otaegi Leonet

Misioaren «erdian» da 'Orion' ontzia, eta aurreikusi baino emaitza hobeak lortu ditu NASAk. Errekorra ere hautsi dute: bidaiariak eraman ditzaketen ontzien artean, Lurretik urrutien egon dena da.

 ©Gorka Rubio / FOKU

«Arima pixka bat falta da orain, bai unibertsitatean eta bai hedabideetan»

Unai Zubeldia - Gipuzkoako Hitza

Bokazioz irakaslea dela aitortu du Joxerra Garziak, baina lan asko egindakoa da bai bertsolaritzan eta bai komunikabideetan. Erretiroa hartuta ere, ikastaroak eman eta eman ari da oraindik.

Herritar ugarik produktuz beteriko poltsak utzi dizkiete Elikagai Bankuko boluntarioei. ©JAIZKI FONTANEDA / FOKU

Elkartasunez bete dira orgak

Aitor Biain

Hego Euskal Herriko Elikagai Bankuek bilketa nagusia egin dute, urtero bezala. Ehunka tona elikagai eta oinarrizko produktu bildu dituzte dendetan eta supermerkatuetan.
 ©IÑIGO URIZ / FOKU

«Trantsizioa egitea, nola esan... zoriontasun eztanda bat da»

Iker Tubia

Gorputza estaltzen duten babesetan gordetzen da Gomez izotz hockeyan aritzeko. Ia bizi osoan gorde behar izan du emakume zela, baina orain ez du ezkutatzen. Partida hor dago oraindik.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.