Albistea entzun

Balentziaga josiko dute

Jon Garañok, Jose Mari Goenagak eta Aitor Arregik telesail bat zuzenduko dute Cristobal Balentziaga jostunaren inguruan. Disney Plus plataformak estreinatuko du, 2023. urtean.
Cristobal Balentziaga Getariako (Gipuzkoa) jostunaren bizitzaren parte bat edo batzuk kontatuko ditu fikzioak.
Cristobal Balentziaga Getariako (Gipuzkoa) jostunaren bizitzaren parte bat edo batzuk kontatuko ditu fikzioak. BERRIA Tamaina handiagoan ikusi

Urtzi Urkizu -

2021eko azaroak 19 - Donostia

Aurreko mendeko jostun eta diseinatzaileen artean entzutetsuenetako bat izan zen Cristobal Balentziaga (Getaria, Gipuzkoa, 1895-Javea, Espainia, 1972). Parisen egin zituen lanean hiru hamarkada luze; 36ko gerra piztu zenean, zituen dendak itxi, eta Frantziako hiriburura jo zuen. Han zabaldu zuen lantegia, George V etorbidean, 1937an. Goiz da jakiteko Balentziagaren bizitzako zer pasarte ikusiko diren Disney Pluseko telesail berrian, baina Jon Garaño zinemagileak argi du Parisek azaldu beharko duela, «modu batean edo bestean» —Handia filmean, Baionan irudikatu zuten Paris—. Garañok, Jose Mari Goenagak eta Aitor Arregik beren lehen telesaila zuzenduko dute, eta Gipuzkoako jostuna izango da protagonista nagusia.

Moriarti eta Irusoin ekoiztetxeetako ekoizle Xabier Berzosak ohartarazi du oraindik ez direla preprodukzioarekin ere hasi. Disneyk duela egun batzuk iragarri zuen «Espainiako lehen ekoizpen originala» izango dela Balenciaga —behin-behineko izenburua da—.

Proiektuaren ideia Lurdes Iglesias gidoilariarena da. «Ez genuen ezagutzen», azaldu du Garañok. «Euskal Herritik kanpo ibili da azken urteotan. Bere proiekturako ekoiztetxeak bilatzen hasi zen, eta gugana jo zuen». Ideia interesgarria iruditu zitzaion Berzosari: «Iglesiasen hasierako ideiatik egingo dugunera gauza asko aldatuko dira. Edonola ere, Iglesias gidoilarien lantaldean sartu da. Hark eman zigun lehen bultzada, eta gustura ari gara harekin lanean».

Iaz, pandemiako konfinamendu garaian, idatzi eta idatzi aritu ziren Moriartikoak. Garañok zera dio: «Une batean zortzi proiektutan lanean genbiltzan. Batzuetan gidoia bazegoen, eta bertsioekin genbiltzan. Eta beste batzuk bost orrialdeko ideiak ziren. Iglesiasen proposamena iritsi zenean, beste proiektu bat nahiko aurreratua genuen, eta bazirudien hori egingo genuela, baina Balentziagari buruzko telesailak aurrea hartu zion».

Berzosa gustura dago proiektuarekin, plataformarentzat hasieratik aritzeagatik. «Burutik kendu ahal izan dut ekoizle gisa sor daitekeen beldurra: banaketaren mundu zaila nola kudeatuko dudan. Ordu asko pasatzen dira normalean banatzaileak ixten, telebistekin edota plataformekin akordioak ixten... Erabaki asko daude. Eta, kasu honetan, hori guztia zuzenean daukagu hasieratik».

Sofia Fabregas Disney Pluseko Espainiarako ekoizpen originalen presidenteordeak nabarmendu du Balentziaga mugak gainditzen dituen ikono bat dela, eta plataforman sortzaile onenekin lan egiteko asmoa dutela.

Berzosari iruditzen zaio Euskal Herriko sektorearentzat «bultzada handia» izan daitekeela Disney Plusentzat telesail bat egin ahal izatea: «Ea aukera gehiago sortzen diren». Ildo berean mintzo da Garaño: «Euskal Herrian egindako telesail bat izango da, euskaldunek egina pertsonaia euskaldun bati buruz. Oso ondo dago Disney horrelako istorio batera erakarri izana». Gainera, oraingoz, baldintza batzuk badituzten arren, ez dituzte muga asko. «Askatasun osoa eman digute istorioa gure modura kontatzeko, eta eskertzen da». Berzosak dio Disneyk konfiantza eman diela. «Eta orain arte egin dugun lanaren jarraipena egiteko aukera ere bai. Telesail forman izango da, baina gure sormena errespetatuz. Gure tokia erraz aurkituko dugu lankidetza horretan».

Narrazioari dagokionez, ez da kontu bera bi orduko film bat sortzea edo sei ataleko telesail bat egitea. Alde horretatik, Garañok hausnarketa hau egin du: «Batzuetan, geure buruari esaten diogu bost orduko pelikula bat bezalakoa izan daitekeela. Baina kapitulu bakoitzak arku dramatiko bat izan behar du, eta horrek eragiten du orokortasunean. Atal bakoitzak modu independentean funtzionatu behar du».

Moriartiko zinemagileak argi du Balentziagaren gorabeherak pantailan islatzeko produkzio lan handia beharko dela. «Proiektu handi bat da. Garai desberdinak jasoko ditu, jantziteria, luxua egongo da...».

Garañok, Goenagak eta Arregik publizitateko lan bat egin berri dute: Espainiako Loteriaren Gabonetako iragarkia. «Esperientzia berezia eta berria izan da guretzat», esan du Garañok.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©JAIZKI FONTANEDA / FOKU

«Guztiok gatoz leku beretik: guztiok gara afrikarrak»

Unai Etxenausia

'Geu, afrikarrok' aurkeztu du Arrosagaraik, zenbait gazteren istorioak biltzen dituen erakusketa bat, Gasteizko Montehermoso kulturunean. Otsailaren 26ra arte egongo da ikusgai.
Madrilgo komentu batean

'Marten' hegaldia

Enekoitz Telleria Sarriegi

Francoren erregimenak, Eliza katolikoarekin batera eta Australiako Gobernuarekin tratua eginda, ehunka euskal emakumezko bidali zituen Australiara, 1960ko hamarkadan. Han lana eginaraztea eta aurretik hara bidalitako gizonezkoekin ezkonaraztea zen bidaia haien benetako helburua. 'Marta plana' deitu zioten, eta 'El avión de las novias' dokumentalean jaso dute.

«Misiolari gisa bidali nahi gaituzte»

«Misiolari gisa bidali nahi gaituzte»

Enekoitz Telleria Sarriegi

Natalia Ortiz ikerlariak, besteak beste, Josefina Erezuma bizkaitarraren istorioa jaso du bere ikerketan, Jaime Aberasturi senargaiarekin izan zuen eskutitz trukearen bidez.

 ©OIER ARANZABAL

«Audio plataforma bat sortuko dugu datozen hilabeteetan»

Urtzi Urkizu

Ikus-entzunezkoetarako Primeran iritsiko den moduan, irrati eta audioetarako beste plataforma bat sortuko dute, Goñik iragarri duenez. «Kolaborazioak sustatuko ditugu euskalgintzarekin».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.