Plataformetan galegozko edukien presentzia hutsala dela salatu dute

Katalunian eta Euskal Herrian, katalanaren eta euskararen aldeko mugimenduak kezkatuta azaldu izan dira telebistetan eta streaming plataformetan hizkuntza horietako edukiak gutxi direlako, eta Galizian ere hala daude. Galiziera Normalizatzeko Mahaiak txosten bat aurkeztu du berriki, eta salatu du Espainian egoitza duten plataformak ez direla betetzen ari ikus-entzunezkoen lege berria.

Iazko uztailean Espainiako Kongresuan onartu zen legeak dio TVEk galegoz, euskaraz eta katalanez eskaini behar dituela 12 urte baino gutxiagoko neska-mutikoentzako edukiak, baina ez dira hala egiten ari. «Lege berriak dio TVEren programazioaren %2,5ek eta Interneteko katalogoaren %1,5ek galegoz egon behar duela, gutxienez», ohartarazi du Galiziera Normalizatzeko Mahaiak.

Legeak kuota batzuk betetzera behartzen ditu egoitza Espainian duten streaming plataforma pribatuak ere, baina Filmin da edukiak galegoz eskaintzen ari den bakarra: katalogo osoaren %0,30 ikus daiteke galegoz —bikoiztuta edo azpidatzita—, eta haurrei zuzendutako katalogoaren %0,74.

RTVE Play plataforman, galegozko lau film baino ez daude, baina haietako batean (Cuñados) ezin da ikusi galizierazko jatorrizko bertsioa. Haur eta gazteentzako katalogoan, ez dago galegozko eduki bakar bat ere. «Telebistaeta plataforma pribatu ugari RTVE publikoaren bide bera ari dira egiten, legea urratuz», salatu du galizieraren aldeko elkarteak. Movistar Plusen, soilik bi lan daude galegoz ikusgai.

Netflix eta Amazon

Nahiz eta legeak ez dituen horretara behartzen, Netflix eta Amazon Prime Video azkeneko hilabeteetan ari dira eduki batzuk galegoz bikoizten eta azpidazten —euskaraz eta katalanez ari diren moduan—. Netflixen katalogo osoaren %1,44 dago galegoz —106 lan daude bikoiztuta edo azpidatzita—; haurrentzako katalogoan, ehunekoa apur bat handiagoa da: %1,89. Amazon Prime Videon, berriz, 33 lan daude galegoz ikusgai —katalogo osoaren %0,44—. Haurrentzako katalogoan, ordea, ezin da ikusi edukirik galizieraz.

HBO Max eta Disney Plus plataformetan, bestalde, ez dago eduki bakar bat ere galegoz ikusterik.

Galiziera Normalizatzeko Mahaiko presidente Marcos Maceirak zera ohartarazi du: «Ikus-entzunezkoena sektore estrategikoa da hizkuntzaren, kulturaren, ekonomiaren eta gizartearen ikuspuntutik».Haren iritziz, hizkuntzak iraun dezan funtsezkoa da Galiziako Xunta gehiago inplikatzea galegozko edukietan. Gaur egun, TVGk gutxieneko eskaintza bat egiten du galegoz haur eta gazteentzat. Mahaiaren arabera, TVGren Interneteko plataforma indartsu batek erraztu egingo luke haur eta gazteek eduki horiek ikusi ahal izatea. Plataforma hori irailaren 1ean abiaraziko zuela iragarri zuen TVGk.