Series Mania jaialdiko edukiak Iparraldean ikusgai, sarean

Canneseries jaialdiarekin batera, munduan prestigiorik handiena duen telesailen jaialdia da Series Mania. Lillen (Frantzia) ospatzen da, eta aurten martxoaren 17tik 24ra egingo dute. Hara joan gabeere, hainbat telesail eta zuzeneko ekitaldi Interneteko plataforma batean ikusi ahalko dira Lapurdin, Nafarroa Beherean, Zuberoan, Korsikan eta Frantzian. Seriesmaniaplus.com atarian izena eman behar da horretarako. Martxoaren 16an hasiko dira edukiak eskaintzen.

Nazioarteko lehia nagusian, urteko fikziorik esanguratsuenetako bat bihur daitekeena hautatu dute: Amazon Prime Videoren The Power. Naomi Aldermanen eleberri arrakastatsu batean dago oinarrituta. Zientzia fikziozkoa da istorioa: zenbat herrialdetako neska nerabe batzuek jendea elektrokutatu dezakete hatzekin ukituta. Aktore protagonistak Toni Collette, Alice Eve, John Leguizamo eta Auli'i Cravalho dira. Jaialdia amaitu eta egun gutxira iritsiko da Amazoneko katalogora.

Horrez gain, Nerea Castrok (Bilbo, 1975) idatzitako telesail bat lehiatuko da Lillen: Mentiras pasajeras (Paramount Plus). Blanca Andres Gomez eta Pol Cortecans dira beste bi gidoilariak. Trama hau da: Luciak (Elena Anaya) goi teknologiako enpresa batean egiten du lan. Kargu hobea eman behar zioten egunean, industria espioitza leporatuko diote. Castro bizkaitarrak hamabost urte daramatza Madrilen lanean, fikzio ugaritan zuzendari laguntzaile lanak egiten, baita gidoiak idazten ere.

Nazioartean arreta piztuko duen beste telesail bat Les gouttes de Dieu da. Frantziako telebista publikoak, Japoniako Huluk eta Apple TV Plusek koprodukzioan egin dute. Izen bereko mangan oinarrituta dago, eta 2009an lehen telesail bat estreinatu zuen Nippon TV kateak. Arranditsuagoa da bertsio berria. Tomohisa Yamashita kantari japoniarrak jokatzen du rol protagonista, eta Lillera joatekoa da.

Nazioarteko lehia nagusian beste honako hauek dira hautagaiak: De Grâce (Arte, Frantzia); Red Skie (Reshet 13, Israel); Milky Way (Mega TV, Grezia); The Actor (Filimo, Iran); eta Fortress (Norvegia).

Lehiaz kanpo, beste telesail batzuen mundu mailako estreinaldiak egingo dituzte: lehen egunean, esaterako, Amazon Prime Videoren Greek Salad proiektatuko dute —Cedric Klapisch aktore eta zinemagilearena da—; eta itxiera galan, Netflixen Transantlatic emango dute —Unorthodox arrakastatsuaren Anna Wingerrek sortu du, eta kazetari baten istorioa kontatzen du—.

Nazioarteko lehian, epaimahaiko presidentea Lisa Joy gidoilari eta ekoizlea izango da —Westworld telesaila sortu zuen—.

Joana da Westworld-en garaia HBO Maxen. Plataforma horretara Succesion telesailaren denboraldi berria iritsiko da martxoaren 27an, eta astebete lehenago, fikzio horretako aktore Brian Coxek hitzaldi bat emango du Lillen —Interneteko plataforman ere ikusi ahalko dira halako hitzaldi batzuk—. TF1 kateko zuzendari nagusi Rodolphe Belmerrek emango du hitzaldietako bat, eta Sky Studioseko Cecile Frotek beste bat.

Jaialdian ikusi ahalko den Afrikako telesail bakarra, berriz, Black Santiago Club izango da. Beninen eta Senegalen grabatu dute.

Madani umoristaren fikzioa

Series Manian beste estreinaldi aipagarri batzuk egongo dira. Tartean, Nawell Madani umoristak sortu duen lehen telesaila: Jusqui'ci tout va bien. Familiaz, sosoritateaz eta emakume arrazializatuek hedabideetan tokia egiteko duten borrokaz hausnartzen du fikzioak. Jaialdiaren ostean, Netflixek bere katalogoan jarriko du.

Hego Koreako Duty after school, berriz, k-drama bat da, eta fantasia asko sartu dute istorioetan. Paramount Plus plataformaren Rabbit Hole telesailak zeresana emango du —Kiefer Sutherland da aktore protagonista espioitza istorio batean—.

Filmin plataformak ekoitzitako Autodefensa telesaila ere proiektatuko dute, martxoaren 23an. Umore bitxiko lan hori Hego Euskal Herrian ikusgai dago azaroaren 29tik. Katalanez eta gaztelaniaz grabatua dago, eta sortzaile eta aktoreak Berta Prieto eta Belen Barenys dira.