Desinformazioari aurre egiteko praktika onen kode bat sortu dute

Albiste faltsuen eta desinformazioaren gaiarekin kezkatuta dabil azkeneko urteetan Europako Batzordea, eta zenbait egitasmo abiarazi ditu. Besteak beste, Interneteko desinformazioari aurre egiteko praktika onen kodea indarrean da atzotik. Bereziki plataforma digitalentzat da kodea, eta zenbait konpromiso indartzea du helburu: kontu faltsuen zabalkundea geldiaraztea, albiste faltsuen bitartez diru sarrerak lortzeko aukera moztea, erabiltzaileek sare sozialetako propaganda politikoa bereiztea, gardentasun handiagoa izatea, eta informazioa egiaztatzeaz arduratzen diren enpresekin elkarlana indartzea.

Plataformek beren borondatez bat egin dezakete egitasmoarekin. Orain arte 33 plataforma dira Europako Batzordearen kodearekin bat egin dutenak; tartean dira Meta (Facebook, Instagram, Whatsapp), Twitter, Tiktok eta Microsoft. Sinatzen azkenetakoa Twitch plataforma izan da.

Aintzat hartu behar da urtea amaitu baino lehen zerbitzu digitalen Europako araudi berria sartuko dela indarrean, eta horrek legezko betebehar batzuk ezarriko dizkiela teknologia konpainia handiei —bai gardentasunean, bai desinformazioaren aurkako lanean—. Hortaz, praktika onen kodea aurrerapauso bat da hemendik hilabete gutxira onartuko diren legeekin lotuta.

Europako Batzordeak, era berean, nabarmendu du kodea baliagarria izango dela plataforma txikientzat eta datuak egiaztatzeaz arduratzen diren enpresentzat, horrela modua izango dutelako Interneteko «praktika txarrak» gutxiagotzeko.

Enpresa egiaztatzaileak

Kodearen aurkezpenean, Bruselan, Vera Jourova Europako Gardentasun eta Balio Batzordeko presidenteordeak goraipatu egin du emandako aurrerapausoa: «Erakusten ari gara ekosistema seguruago eta gardenago bat posible dela. Egiaren balioa ahazten duen gizarte bat dekadentea da, eta Europan ez dugu halakorik nahi». Europako Batzordeko ordezkariak aitortu du aurreko kodeak ez zuela zaintza mekanismo nahikoa, eta orain arte plataformek konpromiso txikiagoa zutela beren datuak eskaintzeko. Kode berriak hesi bat jartzen die albiste faltsuen bitartez etekin ekonomikoak lortu nahi dituztenei.

2018koa zen aurreko kodea. Orduko harekin alderatuta, testu berriak argi adierazten du datuak eta informazioa egiaztatzeaz arduratzen diren enpresekin elkarlanean aritzeko beharra. Enpresa horien artean daude Demagog, Faktograf, Pagella Politica, Maldita eta beste hainbat. Horiek guztiek bat egin dute praktika onen kodearekin. Halaber, sinatzaile guztiek konpromisoa hartu dute elkarlan garden, egituratu eta ireki baterako, eta finantza aldetik bideragarriak izateko.

Bruselak gardentasunari eskainitako zentro bat sortuko du. Lantalde egonkor bat egongo da, kodearen jarraipena egin eta haren helburuak bete daitezen.