'Irabazi arte'-ko bi protagonistek kirolariak elkarrizketatuko dituzte

Irabazi arte telesailaren hirugarren atalaren emanaldiarekin bat eginez, fikzio horretan parte hartzen duten pertsonaia protagonistetako bik podcast bat egingo dute gaurtik aurrera EITB Podkast atarirako. Arene eta Nora pertsonaiak ariko dira aurkezle—Sua Enparantza eta Nahia Sillero aktoreek antzezten dituzte rolak—, eta, horrenbestez, fikziotik errealitatera egingo dute jauzi. Izan ere, podcast berri horretan Euskal Herriko benetako kirolariak elkarrizketatuko dituzte. Ostiralero emakumezkoen kirolarekin lotura duten gonbidatuekin egingo dute solas.

Gaurko estreinaldian, Nerea Eizagirre Realeko kapitaina izango da gonbidatu nagusia. Datozen asteetan, berriz, Nadet Agirre arraunlaria eta Maitane Urbieta Euskadi Irratiko kirol kazetaria izango dira elkarrizketatuetako batzuk.

Podcasta sortzeak badu loturarik ETB1eko telesail berriaren argumentuarekin. Izan ere, Areneren aitak eta Noraren amak herriko irratian lan egiten dute. Bi neskek baimena eskatuko diete estudio horretan podcast bat grabatzeko. Poz-pozik jarriko dirabaiezkoa jasotakoan.

Kirola hartuko dute hizpide ostiralero, baina Irabazi arte-ko protagonisten podcastean izango dira mintzagai gehiago: musika, aktualitateko gaiak, bitxikeriak eta bestelakoak aipatuko dituzte, gehienetan kirola aitzakiatzat hartuta.

EITB Podkast atarian entzun daiteke bi minutuko aurrerapen atal laburra, eta bertan Arenek eta Norak erabaki dute beren podcastari telesailaren izen bera jartzea: Irabazi arte. Gonbidatuen zerrenda egiten ari direla kontatzen dute; Garazi Murua Athleticeko jokalaria eta Uribarri Barrutieta errugbi jokalaria aipatu dituzte. «Olinpiar Jokoetan parte hartu duten kirolariren bat ere sartu beharko genuke», diote. Podcasterako sintonia ere badute: telesailerako Chill Mafia taldeak sortutako bera. Irene Cervantesek jartzen dio ahotsa kantari.

Ikusle datu onak

Gaztetxoentzako telesail berria Go!azen-en gailu eramangarrietarako aplikazioan ere ikus daiteke, baita EITBren nahieran zerbitzuan eta Youtubeko kanalean ere; Instagramen eta TikToken eduki berezituak dituzte. Podcast berrian, bestalde, telesailean lantzen dituzten gaiak jorratuko dituzte: emakumeen ahalduntzea, nerabeen eta gurasoen arteko harremanak, familia eta gazteen gaur egungo erronkak.

Ostiral gauetako ETB1eko emankizunek oso ikusle datu onak izan dituzte orain arte. Otsailaren 11ko estreinaldiak %6,6ko ikusle kuota izan zuen Araban, Bizkaian eta Gipuzkoan —euskaldunen artean, %17,5ekoa—; 4-12 urteko haurren artean, %42,9ko kuota izan zuen, eta 13-24 urteko gazteen artean, %45,9koa. Bigarren atalak euskaldunen artean %13,2ko ikusle kuota lortu zuen; %29,9ko kuota izan zuen 4-12 urte arteko ikusleen artean.