Albistea entzun

Espainiako Gobernuak lege dekretu bat onartu du RTVE berritzeko

Hilabete bateko epean izendatuko dute presidente berria. PPk helegiteak aurkeztuko ditu
RTVEko Donostiako egoitzako langileak, atzo. Ostiraletako protestekin jarraituko dute irrati-telebistako langileek.
RTVEko Donostiako egoitzako langileak, atzo. Ostiraletako protestekin jarraituko dute irrati-telebistako langileek. BERRIA Tamaina handiagoan ikusi

Urtzi Urkizu -

2018ko ekainak 23

RTVE behin-behinean arautu ahal izateko, eta botere hutsunea egon ez dadin, Espainiako Gobernuak lege dekretu bat onartu du. Berehala jarriko da indarrean, eta, horren arabera, hamabost eguneko epean RTVEko administrazio kontseiluko hamar kide berriak aukeratuko dituzte —sei Kongresuak eta lau Senatuak—. Isabel Zelaa Espainiako Gobernuko bozeramaileak iragarri duenez, kide horiek bi hereneko gehiengoarekin onartu beharko dituzte Espainiako Kongresuan lehen bozketan, eta gehiengo absolutuz bigarren bozketan handik 48 ordura. Haietako bat izango da presidente berria —hilabete bateko epean izendatuko dute—. Jose Antonio Sanchezek atzo utzi zuen kargua, legeak hala aginduta.

PSOEko ministroak, edonola ere, gogoratu du RTVEko presidente berria behin-behinekoa izango dela, eta iazko irailean onartu zen legeak bere bidea egingo duela. Hau da, adituen batzorde bat hautatuko dute, eta lehiaketa publiko bat egongo da hurrengo presidentea aukeratzeko. «Gobernuak hartu duen erabakiarekin, iazko legearen prozesua ez betikotzea nahi dugu. Ezin dugu utzi RTVEk orain arteko kontrol ideologikoarekin jarrai dezan», esan du Zelaak.

Gobernuko bozeramaileak baieztatu du PSOEk Espainiako Kongresuko beste talde politiko batzuen babesa duela. «Sorrerako oinarriak fideltasunez beteko ditu RTVE berriak: pluraltasuna, independentzia, inpartzialtasuna, egiatasuna eta objektibotasuna».

PPko bozeramaile Rafael Hernandok iragarri du bere taldeak helegiteak jarriko dizkiola gobernuaren lege dekretuari, «ahalik eta auzitegi gehienetan». Gaineratu du Espainiako Gobernuaren erabakia «deitoragarria» dela eta RTVE beretzat nahi duela.

Prentsaurrekoaren ostean, Zelaak adierazi du RTVEko presidente berriak ikus-entzunezko munduko pertsona «garrantzitsu» bat izan behar duela: «Eragozpenik eta objekziorik onartzen ez duena».

Ciudadanosek gogor kritikatu du gobernuaren dekretua: «Nahi zuten bakarra Tele PP kentzea zen, Tele PSOE jartzeko».

Podemosen ustez, «ezinbestekoa» zen egungo zuzendaritza kentzea eta Kongresuko pluraltasuna kontseiluan islatzea.

Protestak ez dira amaituko

RTVEko langileek protestekin jarraitzen dute. Bi hilabete dira ostiralero beltzez jantzita ageri direla, kameraren aurrean eta atzean. Batzar batean, langileek erabaki dute «ostiral beltzekin» jarraitzea, RTVEren «independentzia» eta «pluraltasuna» bermatzen dituen konponbide adostu bat lortu arte. Albistegietako kontseiluek bat egin dute erabaki horrekin. Hego Euskal Herriko lau hiriburuetako langileek ere protesta egin zuten atzo.

UGT sindikatuak esan du gobernuaren lege dekretua erabaki «ausarta» eta «beharrezkoa» dela, eta eredu berri bat egonkortu beharko dela, «agintzen duenak aginduta ere».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Joker liburu dendako postua atzo, Getxoko Santa Eugenia plazan. ©OSKAR MATXIN EDESA / FOKU

Getxo gero eta japoniarragoa

Amaia Igartua Aristondo

Azkenaldian igo egin da mangarekiko interesa, eta Getxoko Komiki Azokako postuetan nabarmena da ildo aldaketa hori. Euskarazko komikiak ere gehiago egin eta saltzen dira.
Josette Dacosta margolariak mihiseak lurrean jarrita margotzen du. ©GUIILAUME FAUVEAU

Teklen bitartez emandako pintzelkadak

Ane Insausti Barandiaran

Adimen artifizialaren bidez, posible da ordenagailuari agindu bat eman eta hark obra bat sortzea. Hori artea ote den zalantzan jarri izan du, ordea, jendeak; hala gertatu da, adibidez, Coloradoko arte lehiaketa batean. Artista eta ikertzaileek esan dute pieza bat sortzea, fisikoki ez bada ere, artea egitea dela.
 ©JAIZKI FONTANEDA / FOKU

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...