Albistea entzun

Sally Buzbee

Associated Pressetik 'Post' zuzentzera

'The Washington Post' egunkariaren aurreneko emakumezko zuzendaria izango da Sally Buzbee. Associated Press agentzian egin du bere ibilbide guztia. AEBetako kazeta munduan zabaltzeko hautatu dute.
BERRIA Tamaina handiagoan ikusi

Urtzi Urkizu -

2021eko maiatzak 15

Kansasko Unibertsitatean (AEB) kazetaritzan lizentziatu zenetik, bere ibilbide guztia Associated Press albiste agentzian egin du Sally Streff Buzbeek (Walla Walla, Washington, AEB, 1965). Han, askotariko kazetaritza lanak egin ditu, eta goi mailako ardurak bete. Kazetaritzaren munduan sona handiagoko kargu bat beteko du ekainaren 1etik aurrera: The Washington Post egunkariaren 144 urteko historian aurreneko emakumezko zuzendari bilakatuko da.

Jeff Bezos enpresariak AEBetako egunkaria 2013an erosi zuenetik kontratatzen duen lehen zuzendaria ere izango da Buzbee. Izan ere, azkeneko zortzi urteetan Martin Baronek bete du zuzendari kargua, eta otsailean hartu zuen erretiroa. Bezosek zenbait elkarrizketa egin ditu azken hamar asteetan zuzendaria aukeratzeko. Post-ek berak argitaratutako informazioaren arabera, Kevin Merida —Los Anges Times-eko zuzendari berria—, Cameron Barr eta Steven Ginsberg ziren beste hautagaiak; azkeneko biak Post-en bertan ari dira gaur egun beharrean.

Baina nazioarteko zabalkunderako daraman estrategian, Bezosek editore lanean eskarmentu handia duen kazetari bat aukeratu du. Buzbeek Kansasen hasi zituen kazetari lanak, Associated Pressen, eta, ondotik, Los Angeles, San Diego eta Washington hirietako bulegoetan aritu zen. 1990eko hamarkadan, albiste agentziako zuzendariordea izan zen, eta hark gainbegiratzen zituen nazioarteko eta segurtasun nazionaleko gaiak. 2010etik 2016ra, Washingtongo bulegoko arduradun nagusia izan zen: 2012ko eta 2016ko AEBetako hauteskunde presidentzialen berri eman zuen; baita kongresuko aktibitatearena ere.

2017an, Associated Presseko zuzendari eragile eta presidenteorde izendatu zuten Buzbee. Lau urteotan, 2.800 kazetari dituen talde handi bat gidatu du. Munduko albiste agentzia handienetako bat da hori. Mila kazetari zuzenduko ditu orain AEBetako egunkarian. Enpresak 2.500 langile inguru ditu.

«Lider eredugarria»

The Washington Post-ek argitara eman duenez, Fred Ryan editoreak asteartean eman zien langileei izendapenaren berri. Ryanek berak zuzendari berriaren ezaugarriak goraipatu ditu: «Gure balioak partekatuko lituzkeen pertsona baten bila aritu gara, tentu handiz. Mundu mailako kazetari baten bila genbiltzan, eta bozeramaile izateko sinesgarritasuna eta seriotasuna izango duen norbait ere nahi genuen». Eta editoreak zera gaineratu du Buzbeeren inguruan: «Lider eredugarria da, kazetaritzaren ohitura onenetan trebatutako kazetari bat».

Post-ek bulego berriak zabalduko ditu aurten Londresen eta Seulen. Sydneyn (Australia) eta Kolonbian ere zabalduko dituzte geroago. Hala, 26 bulego izango dituzte AEBetatik kanpo. Buzbeek adierazi du zabalkundearen erdian kargua hartzeak «hunkitu» egin duela: «The Washington Post-ek kazetaritza legatu aberatsa eta zoragarria du. Zabalkundearen eta berrikuntzaren garai honetan lantaldera iristea zirraragarria da».

Egunkariak hiru milioi harpidedun digital ditu. Inoiz baino kazetari gehiago izango ditu aurten.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Miren Jone Azurza, artxiboko irudi batean. ©Jon Urbe/ FOKU

Miren Jone Azurza kazetaria hil da, 92 urterekin

Berria

'Zeruko Argia' zuzendu zuen 1969 eta 1975 bitartean. Gero, 'Deia' egunkarian aritu zen lanean. 2011n Ohorezko Rikardo Arregi Saria jaso zuen, eta 2018an ohorezko euskaltzain izendatu zuen Euskaltzaindiak.

 ©JAIZKI FONTANEDA / FOKU

«Herriaren ondarea da auzolana, gizartea osasuntsuagoa izan dadin aberasgarria»

Amaia Ramirez de Okariz Kortabarria

Mozambiketik bueltan erabaki zuen Gabilondok gertuko zuen Garaioneko proiektua berriz hartzea. Sorkuntza, ondare soziala eta natura ditu ardatz, baina baita euskara eta feminismoa ere, zuzenki aipatu ez arren «halabeharrez» egon behar dutelako hor.
Emakume bat, Bilboko Konpartsek, atzo, Bilboko Plaza Barrian antolatutako Kapela Egunean. ©ARITZ LOIOLA / FOKU

Bilbok buruan darabilena

Iñigo Astiz

Aste Nagusia hasteko ehun egun baino gutxiago falta direla gogoratzeko Kapela Eguna antolatu dute Bilboko Konpartsek, eta atzerako kontagailu bat ere jarri dute Plaza Barrian.
Svenja Jung aktoreak bi rol jokatzen ditu telesailean: bi ahizpa biki protagonistena egiten du. ©COSMO

Cosmo kateak 'Der Palast' telesaila emango du bihartik aurrera

Urtzi Urkizu

Alemanian 6,23 milioi ikus-entzule izan ditu (%20,1). Crossover jaialdian lehen atala eman zuten

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...