Jon Ander Garrido. Cadizeko jokalaria

«Garai egokian hor egoteko zortea izan dut»

Espainiako ligara itzuli den urtean, Cadizek ondo hasi du sasoia. Han jokatzen du Jon Ander Garridok; lehen aldia du gorengo mailan: «Klubaren bilakaera ikusi dut».
CADIZ Tamaina handiagoan ikusi

Jon Ander De la Hoz -

2020ko azaroak 20

Saiatzearen ordain gozoa bere larruan ezagutu du Jon Ander Garridok (Getxo, Bizkaia, 1989). Futbolari bizkaitarrak behe mailetan egin ditu bere ibilbideko urterik gehienak. Irailean estreinatu zen Lehen Mailan, Cadizeko elastikoa soinean zuela. Reala jasoko dute etzi, ligako partidan: «Gure aukerak aprobetxatu nahi ditugu».

Aurten estreinatu zara Lehen Mailan, 31 urterekin, San Mamesen jokatu zenuten partidan. Berezia izan al zen?

Nork esan behar zidan orain lau urte, Bigarren Mailan nengoenean. Oso polita da, eta zer esanik ez San Mamesen egin izana. Niretzat, izugarria izan zen. Jendea, etxekoak, harmailetan baleude, areago. Beti oroituko dut, halere.

Adin horrekin debuta egin izana ez etsitzearen ondorioa al da?

Izan daiteke, baina, nire moduan, beste jokalari asko daude lan asko eginagatik iritsi ez direnak. Garai egokian hor egoteko zortea izan dut. Sari bat da; azken finean, ez naiz oso bertutetsua, eta nire moduko ugari daude behe mailetan. Getxon eta Barakaldon gogor saiatu naiz, eta horrek ekarri nau hona.

2014an iritsi zinen Cadizera. Racing Ferrol eta bestetan utzita aritu zara gero. 2.B mailatik gorainoko bidea ezagutu duzu. Garairik onena da?

Oso eroso nago. Ondo lotu natzaie klubari eta zaleei, eta klubak aurrera nola egin duen ikusi dut. Urte asko zeramatzan 2.B mailan; koskaz koska hobetu du, eta bilakaera horretan hor egon naiz ni, klubeko beste langile askoren moduan. Familia baten modukoa da.

Hiru maila profesionalak ezagutu dituzu. Asko aldatzen al da batetik bestera?

Asko, baina aldaketa hori kendu egin digute, jendea falta delako. Mailari heldu nahi diogu, datorren urtean aldaketa hori benetan ikusteko: zaleak harmailetan, prentsa gehiago... Hor, agian, presioa areagotu egingo da.

Arantza hori al duzu?

Bai. inoiz ez dakizu non egongo zaren, eta Lehen Mailan zaudenean, zer esanik ez. Arantzatxoa bada, baina lan egingo dugu datorren urtean ere goian segitzeko.

Dena ez da ederra izan. Zortzi hilabete egin dituzu min hartuta, eta pixkanaka itzuli zara. Zer moduz zaude orain?

Ondo, pozik nago. Zortzi hilabetean jokatu ezinik egon naiz, eta ziurgabetasun betean, gainera: ez nekien zer nuen, eta horrek kalte egiten du. Gogorra izan da; gimnasiotik atera ere ez naiz egin, baina ebakuntzak on egin dit, eta, nahi adina jokatzen ari ez naizen arren, zoriontsu naiz orain.

2023. urtera arte luzatu duzu kontratua. Proiektuari erabat lotuta zaude.

Bai, noski, izugarri gustura nago. Nire bikotekidearekin bizi naiz hemen, eta ezin gara kexatu. Gustatzen zaigu; ondo bizi gara, eta proiektua ona da. Egunen batean itzultzea da asmoa, baina, bitartean, iraun dezala.

Kirol arloan, lehiara itzuliko zarete etzi. Ondo etorri al zaizue atsedenaldia?

Ez, gaizki. Zenbait jokalarik min hartu dute, eta beste batek Ecuadorren geratu behar izan du koronabirusa dela eta. Ez zaigu oso ondo etorri; atseden hartu nahi genuen, baina kale.

Reala jasoko duzue. Orain arteko talderik onena izan da.

Bai, hala da. Guk betiko eran jokatuko dugu, eta ez dugu ezer aldatuko. Defentsiboak gara haien aldean. Aurkariaren zain egoten gara, eta kontraerasora jo. Beti bezala zelairatuko gara, eta ea zer lortzen dugun, baina Realak egiten duenaren araberakoa izango da.

Zeintzuk izan daitezke igandeko neurketaren gakoak?

Realak ematen duen maila. Orain artean bezala aritzen bada, oso zaila izango da guretzat. Etenaren ostean apur bat galduta itzultzen badira, min egin dezakegu, kontraerasora ondo jotzen dugulako. Haiek nola aritzen diren, horrek zerikusi handia izango du.

Garaipen sonatuak lortu dituzue, eta Sevillaren eta Atletico Madrilen aurka soilik galdu duzue. Buruz indartzeko ona da hori, ezta?

Bai, Real Madrili irabazi genion, eta Athletici ere bai. Egia da bilbotarrak ez daudela ondo, eta zuriak ere ez zeuden onenean. Halere, argi izan behar dugu gurea beste liga bat dela; haiei irabazi izanagatik, ez dugu pentsatu behar Realari, Vila-reali eta halakoei irabaziko diegunik. Eibarri irabazi genion, eta puntu horiek dira onak; aurkari zuzenen aurkakoak.

Ederki hasi zarete ligan: seigarrenak zarete. Espero zenuten?

Gustura gaude orain artean egin dugunarekin. Hamalau puntu ditugu, eta ez genituen espero. Dena den, badakigu bigarren itzulian zailagoa izaten dela batzea. Orain lortzen baditugu, errazago ariko gara gero. Ez litzateke harritzekoa izango gerora hamar partida irabazi ezinik egotea, gertatu izan delako. Orain, garrantzitsua da berrogei puntuetara ahalik eta gehien urreratzea.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

 ©LA LIGA

«Entrenatzaileak sentitu egin behar du ezarri nahi duen jokatzeko era»

Ainara Arratibel Gascon

Natalia Arroyo lehen hilabeteak ari da egiten Realeko aulkian. Zortzi bat jarri dio taldeak orain arte egindako lanari. Onartu du partidaz partida joatea dela zuhurrena, baina denboraldiko helburuez galdetuta, gora begiratzeko ilusioa dutela berretsi du.
Erik Jaka, garaipena ospatzen, larunbatean. ©ARITZ LOIOLA / FOKU

Sinetsi, eta sinetsarazi

Jon Eskudero

Kasik ez jokatzen hasi, eta, azkenean, buruz buruko finalean da Erik Jaka. Bere nortasunaren eta lanaren fruituak jasotzen ari dela nabarmendu dute Iraitz Olaetxeak, Xabier Tolosak eta Mikel Saizarrek.
Zutik, ezkerretik bosgarrena da Altuna, eta seigarrena, Jaka. Ezkerretik hamargarrena da Xalton Zabala. ©ANDONI CANELLADA / FOKU

Iturriaren emana

J. Eskudero

Amezketako Zazpi Iturri pilota elkartean ibilirik, txikitako lagunak dira Altuna eta Jaka. Eguneroko harreman sendoa dute. Bien entrenatzaile ohi Xalton Zabala, berriz, zerak betetzen du gehien: bi finalistak direla zentzuzko pertsonak eta pilotaren aldeko kontzientzia dutenak.
1 ©ARITZ ARANBURU / EZEZAGUNA

Aurreiritzien gainetik

Julen Etxeberria

Aritz Aranburuk denbora darama kanabidiola edo CBDa erabiltzen. Kalamuaren deribatuetako bat da, eta nekea, mina eta estresa arintzeko balio du. 2018an WADAk legezkotzat jo zuenetik, gero eta gehiago erabiltzen da kirolean. «Epaitu aurretik, ondo informatzeko eta probatzeko eskatuko nuke», aldarrikatu du.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.