Berdintasunerako proba proiektuak 24 enpresatan

Gizon eta emakumeen berdintasuna enpresa arlora ere irits dadin, probako proiektu bat abiatu dute Gipuzkoako Foru Aldundiak eta Eusko Jaurlaritzak. Bergarako eta Errenteriako Lanbide Heziketako ikastetxeetan ikastaroak ematen hasi dira, eta, horietan, Gipuzkoako 24 enpresatako 35 pertsonak hartuko dute parte. Proiektuaren helburua berdintasuna lortzea bada ere, Lanbide Heziketara andrazkoak erakartzeari «bizkarreko» bat eman nahi diotela azaldu du Rikardo Lamadridek, Jaurlaritzako Hezkuntza saileko Teknologiaren eta Ikaskuntza Aurreratuen zuzendariak. Proiektuaren sustatzaileak «gustura» daudela azaldu dute, enpresetan interes berezia sortu duela sumatu dutelako.