CAF «Palestinaren aurkako aktibo eta protagonista» izango dela dio batzordeak

Ordezkari sindikalek salatu dute CAFek ezingo duela bermatu beharginen segurtasuna Jerusalemgo tranbiaren lanetan. «Langileak gatazka eremu batera joango dira»
Jerusalemgo tranbia.
Jerusalemgo tranbia. CLAUDE VILLETANEUSE Tamaina handiagoan ikusi

Xabier Martin -

2019ko urriak 9

Zapatan hartxintxar bat sartu zaio CAF konpainiari, inoiz baino azkarrago doan honetan. Herenegun, 110 milioi euroren eskaeren berri eman zuen, eta irailean, 700 milioi euroko kontratu erraldoi batena, Frantzian. Kontua da 9.000 milioi eurotik gorako eskaera-poltsa errekor horretan badela bat gaiztotzeko bidean. Jerusalemgo tranbiaren eskaerak jatorrian du bekatua, eta Beasaingo langile batzordea prest dago bere iritzia argi baino argiago gera dadin: «CAF ez da trenbide sistema huts baten hornitzailea izango bakarrik: Palestinako herriaren aurkako politiken alderdi aktibo eta protagonista ere izango da». Hala dio batzordeak aho batez onartu duen agiriak, eta horixe bera helarazi diote zuzendaritzari, Israelgo Estatuaren asmoak gauzatzeak ekar ditzakeen arriskuekin asaldaturik.

Batzordeak berak azaldu du proiektuaren berezitasuna dela azpiegitura hori «Palestinako lurretan legez kanpo eraikitako Israelgo koloniak lotzeko» erabiliko dela. «Agintariek okupazio hori legezkotu eta iraunkortu nahi dute, biztanleei normalizatutako azpiegiturak eskainita». Ordezkari sindikalek gogoratu dute NBE Nazio Batuen Erakundeak legez kanpokotzat hartzen dituela Jerusalem Ekialdeko okupazioak; «hala, indar okupatzaileak ezarritako lan hori ere legez kontrakoa da nazioarteko zuzenbideari dagokionez».

CAFeko presidente Andres Arizkorretak, ordea, berriki azaldu du egoeraren «azterketa etikoa eta legezkoa» egin duela enpresak, eta azterketa horrek «berretsi» egin duela «CAF nazioarteko legeekin eta giza eskubideekin betetzen ari dela». Arizkorretak iragarri du enpresa ez dela sartuko balorazio politikoetan.

Handiek uko egin zioten

CAFeko langile batzordeak Isralego proiektuaren arriskuaz ohartarazi du orain baino lehen. Otsailean, zuzendaritzari eskatu zion lehiaketa horri uko egiteko, eta Palestina Askatzeko Erakundeak esker ona azaldu zien langileei. «Zuen ekintza eta ahalegina eredu da langile europar askorentzat, eta haiek ere zuek erakutsi duzuen duintasun, irmotasun eta etika maila bera izatea espero dugu», adierazi zuen Saeb Erekat PAEko idazkariak.

Ordurako, Europako enpresa garrantzitsuenak joanak ziren proiektu horretatik, lizitazioa egin aurretik, hala nola Alstom, Siemens eta Systra (Frantziako SNCFen adarra), Kanadako Bombardier eta Australiako Mcquarie ere bai. Boikotaren ondorioz, bi talde baino ez ziren geratu: bata, CAFena, eta bestea, enpresa hauena: Shikun & Binui eta Egged (Israel), CRRC (Txina), Comsa (Espainia), Efatec (Portugal) eta MPK (Polonia).

«CAFeko zuzendaritzak, nazioarteko legediari ere aurka eginez, negozioa egitea erabaki du», dio batzordeak. Eta negozio horrek ondorio larriak eragin ditzakeela uste du: «Inork ezingo du CAFeko langileen segurtasuna bermatu obran bertan lan egin behar izanez gero. Langileek gatazka eremu batera joan beharko dute; beraz, CAFeko zuzendaritzak bere langileak jartzen ditu arazoaren erdigunean».

«Ekar litzakeen ondorioak eta CAFeko etorkizuna aintzat hartuta», batzordeak otsaileko eskaera berritu du irmotasunez: «Garaiz gaudela uste dugu. Berriz ere eskatzen diogu zuzendaritzari ez dezala parte hartu Jerusalemgo tranbiaren proiektuan».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Donostiari 1813an su eman ziotela oroitzeko Dora Salazarrek egindako eskultura, maskara jantzita ©JUAN CARLOS RUIZ / FOKU

COVID-19aren uste ustelak

Mikel P. Ansa

COVID-19aren pandemia ukatzen duten joera batzuek indarra hartu dute uda honetan. Haiek zabaldutako uste batzuk zeinen okerrak diren azaldu dute Miren Basaras eta Guillermo Quindos mikrobiologoek artikulu sorta honetan.

PCR proba bat, Indian. Bigarren herrialde kaltetuena da hura. ©SANJEEV GUPTA / EFE

Milioi bat lagun baino gehiago hil ditu COVID-19ak

Iosu Alberdi

AEBetan erregistratu dute kasu eta heriotza gehien. Euskal Herriak munduko heriotza tasa handienetako bat du: 77 heriotza 100.000 biztanleko.

Konfinamendua ezarri zuten Azkoienen. ©Idoia Zabaleta / Foku

Hegoaldeko kasuen erdiak baino gehiago, Nafarroan

Uxue Rey Gorraiz

Beste 603 positibo zenbatu dituzte Hego Euskal Herrian; Nafarroan atzeman dituzte horietatik 318. Halaber, bi pertsona zendu dira birusaren ondorioz.

Maria Txibite, agerraldi batean. ©Jesus Diges / Efe

Txibitek esan du egoera «kontrolatuta» dagoela Nafarroan

Arantxa Iraola

Positibo «asko» izan arren konfinamendu orokorrik ezartzeko asmorik ez dutela adierazi du

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna