LOINTEK GERNIKA BIZKAIA
Talde osoa
Asko falta da ligari hasiera emateko, baina taldea osatua du jada Lointek Gernikak. Sailkapeneko goialdeko taldeekin borrokatzea izango du helburu. Horrez gain, berriro ere Eurokopa jokatuko du. Zuzenean ligaxkan ariko da gainera, atarikorik jokatu gabe. F multzoan izango da, Espainiako Perfumerias Avenida, Hungariako Uni Gyor eta Portugalgo Olivais taldeekin batera.Eraberrituta ekingo dio denboraldiari Gernikak. Sei fitxaketa egin ditu, eta beste hainbeste jokalarik utzi dute taldea. Fitxaketen artean, Blake Dietrick eskoltaren itzulera nabarmendu behar da. Joan den sasoian aritu zen Gernikan, denboraldiko lehen partean; urtarril hasieran utzi zuen taldea. Jokalari garrantzitsua izateko ekarri zuten, eta sobera bete zituen berarengan jarritako esperantzak. Seattletik fitxatu du Gernikak, denboraldi osorako oraingo honetan. Taldeko izarretako bat izango dela espero da, funtsezko pieza Lopezentzat. Dietrickez gain, ordea, fitxaketa garrantzitsuak egin ditu klubak. Belen Arrojo, Perfumerias Avenida talde indartsutik etorri da. Talentua eta freskotasuna emango dizkio Gernikari hegalekoak. Postu berean jokatzen du Julie Wotjak ere. Italiako ligako izarretako bat izan da. Handik dator Nikolina Milic ere, eta barrualdea indartzeko asmoz ekarri dute. Nogaye Lo, berriz, gaztea da, eta etorkizun handiko jokalaria. Azkenik, Gaby Ocete joko antolatzailea esperientzia eta eskarmentu handikoa da, ibilbide luzea baitarama maila nagusian. Bestalde, Naiara Diez kapitainak beste sasoi baterako luzatu du kontratua.
IDK GIPUZKOA
Pisuzko aldaketak
Bost jokalarik utzi dute IDK Gipuzkoa, eta izen handiak daude tartean: Iva Brkic eta Lyndra Weaver, esaterako. 2017ko udan iritsi ziren biak, eta ezinbestekoak izan dira azken bi urteetan taldeak egindako denboraldi arrakastatsuetan. Horrez gain, klubeko erreferente diren bi jokalarik hartu dute erretiroa: Onintza Adurizek eta Iulene Olabarriak. Batera esan diote agur beren kirol ibilbideari. Esperientzia eta eskarmentu handiko jokalariak ziren. 2002-2003ko denboraldian iritsi zen IDK Gipuzkoara Olabarria, eta 2009-2010ekoan Aduriz. Sara Iparragirrek, berriz, Añares Iraurgin jokatuko du datorren sasoian, baina IDK Gipuzkoari lotuta jarraituko du; minutuen bila doa 20 urteko eskolta gaztea.IDK Gipuzkoak merkatura jo du taldea utzi duten jokalariek lagatako hutsuneak estaltzeko, eta bost fitxaketa egin ditu: Ariel Edwards, Laura Garcia, Marita Davidova, Mehryn Kraker eta Snezana Aleksic. Edwardsen fitxaketak sortzen du zaleengan ilusio handien. Kalitate handiko jokalaria da, maila oso oneko errefortzua. Araskin jokatu zuen iragan denboraldian, eta ligako saskiratzaile nagusia izan zen. Dena ondo bidean, garrantzitsua izango da taldearentzat. Hazten jarraitzeaz gain, denboraldi honetan ere Espainiako Koparako sailkatzea izango du helburu Azu Muguruzak zuzendutako taldeak. Aurki ekingo diote denboraldi-aurreari, eta irailaren 3an jokatuko dute lehen lagunartekoa, Araskiren kontra.
