Genero arrakala

Enpresek soldatak erregistratu beharko dituzte sexuen arabera

50 langiletik gorako lantegietan izango da derrigorrezkoa, eta sei hilabeteko epea dute horretarako. Berdintasun planetan jaso beharko dituzte arrakala gainditzeko neurriak
Espainiako Ogasun, Lan eta Berdintasun ministroak, Madrilen atzo eginiko agerraldian.
Espainiako Ogasun, Lan eta Berdintasun ministroak, Madrilen atzo eginiko agerraldian. JUAN CARLOS HIDALGO / EFE Tamaina handiagoan ikusi

Jokin Sagarzazu -

2020ko urriak 14

Espainiako Gobernuak laneko genero desberdintasunaren aurkako bi dekretu onartu zituen atzo. Berrikuntza nagusia da 50 langile baino gehiago duten enpresak behartuta egongo direla sexuaren aldagaia kontuan hartuta soldaten erregistroak sortzera. Agiri horretan azaldu beharko dira gizonek zein emakumeek lan berarengatik jasotzen dituzten soldaten batezbestekoak. Horretarako, lanpostuak baloratzeko sistema bat ezarri beharko dute, eta kanpoko aholkularitza batek lansarien auditoria bat egin beharko die. Hori guztia eta hori konpontzeko neurriak berdintasun planetan jaso beharko dituzte enpresek. Bi dekretuak Lan eta Gizarte Ekonomia Ministerioak, Berdintasunekoak, eta CCOO eta UGT sindikatuek adostu dituzte. Ez dute patronalen babesa jaso.

Yolanda Diaz Lan ministroak azaldu duenez, erregistro horrekin emakumeek eta sindikatuek «lanabes garrantzitsu bat» izango dute soldata berdintasunak eskatzeko. Diazek zehaztu du enpresek sei hilabeteko epea izango dutela araudian jasotakoa garatzeko, eta Lan eta Berdintasun Ministerioak emango dizkiela hori egiteko bitartekoak eta ereduak. Agiri horietan, soldaten informazioa jaso beharko dute, sexuen arabera bereizita, zuzendaritzako langile eta goi kargudunenak barne, balio bereko lanen arabera sailkatuta, eta horren araberako soldaten batezbestekoak eginda. Oinarrizko soldatez gain, osagarriak eta soldataz kanpoko ordainsariak ere jaso beharko dituzte. Horri buruz, Irene Montero Berdintasun ministroak azpimarratu du oinarrizko soldata ez dela desberdintasun iturri nagusia izaten, ordainsari osagarriak baizik, eta, batez ere, antzeko zereginen inguruan egiten diren balorazio ekonomiko ezberdinak. «Tradizioz emakumeei lotuta egon diren trebetasunak gutxiago baloratzen dira, eta emakumeek egiten dituzten zereginak gutxiago baloratzen dira ekonomikoki gizonek egiten dituzten balio bereko zereginekin alderatuta». Emakundek iaz kaleratutako txosten baten arabera, Arabako, Bizkaiko eta Gipuzkoako gizonezkoek emakumezkoek baino %11 gehiago irabazten dute batez beste, lan beragatik eginiko ordu bakoitzeko.

Planak, derrigorrezkoak

Soldaten erregistroetan arrakalarik balego, hori konpontzeko neurriak enpresen berdintasun planetan jaso beharko dituzte enpresek. CCOOk azpimarratu duenez, araudi berriak balioko du planak berme gehiagorekin negoziatzeko, «are eta ageriago utziko baitu desberdintasun erreala».

Iaztik dago indarren berdintasun planei buruzko araudia: iragan martxoaren 7tik aurrera, 150 langile baino gehiago dituzten enpresak derrigortuta daude berdintasun plan bat izatera. 100 eta 150 langile bitarteko enpresek urtebete gehiago izango dute horretarako, eta 50 eta 100 langile artekoek, berriz, 2022ko martxora arte. Araua betetzen ez duten enpresek 626 eta 6.250 eurora bitarteko isunak jaso ditzakete, eta administrazio publikoen kontratazio prozesuetatik kanpo gera daitezke.

Araudira atzo sartutako neurri berrien arabera, berdintasun planak indarrean egongo dira aldeek adosten duten denboraren arabera, eta gehienez ere lau urterako. Denbora horretan lantaldea txikitu eta 50etik beherakoa bada ere, aktibo jarraituko du planak. Enpresek Hitzarmen eta Akordio Kolektiboen Erregistro Publikoan erregistratu beharko dute berdintasun plana, eta administrazioak bereizgarri bat emango die bakoitzeko.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Turismoaren datuak kaskarrak izan dira irailean Euskal Ekonomiaren Termometroaren arabera. ©JON URBE / FOKU

Ekonomiaren errebotea %15,2koa izan da hirugarren hiruhilekoan

Irune Lasa

BPGaren urte arteko jaitsiera -%7,7ra murriztu da Araba, Bizkai eta Gipuzkoan, jarduera ekonomikoak udan izandako erreboteari esker. Enplegua %6,5 urritu da 2019ko hirugarren hiruhilekotik
Trenasan ekoitzitako bi autobus, lantegiko aparkalekuan. ©IÑIGO URIZ / FOKU

Trenasako neurriak planta guztien artean banatzeko eskatu dio Aierdik CAFi

Imanol Magro Eizmendi

Ekonomia eta Enpresa Garapeneko kontseilariaren ustez, «onartezina» da Castejongo lantegia ixtea. CAFek jasotako diru publikoa gogoratu du
Jose Luis Escriva Gizarte Segurantzako ministroa eta Magdalena Valerio Toledoko Itunaren  batzordeko presidentea ©Kiko Huesca (Efe)

Asteartean bozkatuko dituzte pentsioen erreformarako gomendioak

Jokin Sagarzazu

Espainiako Toledoko Ituneko taldeek adostu dute pentsioak KPIa oinarri izan duen indize baten arabera eguneratzea. Lan bizitza luzatzea babestu dute, baina salbuespenak eskatu dituzte erretiro aurreratuak zigortzeko orduan. Eta finantzaketa publikoa argitzea nahi dute, pentsioen sistemari berez ez dagozkion gastuak kentzeko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna