Albistea entzun

Ilun zegoena argituz doa

Zehaztu dituzte errugbiko maila nagusiko hasiera datak, zazpi hilabetez geldirik egon ostean. Ampo Ordizia eta Getxo urriaren 24an hasiko dira; Eibar, abenduaren 12an.
Eibar errugbi taldeko jokalariak, batuta, aurreko denboraldiko bigarren mailako norgehiagoka batean.
Eibar errugbi taldeko jokalariak, batuta, aurreko denboraldiko bigarren mailako norgehiagoka batean. EIBAR ERRUGBI TALDEA Tamaina handiagoan ikusi

Mikel O. Iribar -

2020ko urriak 10

Aurtengo errugbi denboraldia egingo dela jakin berritan, hasperenak dakarren lasaitasuna sentitu dute Iñigo Marotias Ampo Ordiziako entrenatzaileak (Ordizia, Gipuzkoa, 1986) eta Getxoko Ander Calvo (Getxo, Bizkaia, 1996) eta Eibarko Asmae Ourdi (Errachidia, Maroko, 1996) jokalariek. Errugbia kirol ez-profesionala izanda, Espainiako Federazioak zalantza ugari zituen ea bideragarria izango ote zen lehiaketa egitea, izurriaren eraginez. Zailtasunak zailtasun, ilun zegoena argitu dute.

Zazpi hilabeteren ondoren, baloi obalatua airean ikusi zen Altamiran, Ampo Ordiziaren eta Gernikaren lagunarteko partidan, baita Hernaniko Landare Toki berdegunean ere, Getxoren aurkako neurketan. Inoizko denboraldi-aurrerik luzeena egin dute, eta jokatzeko «irrikaz» zeuden errugbiko jokalariak. «Jokatzea zer zen ahaztua genuen», atera zaio barrutik Calvori. Jokalariek azken hilabete «gogor» horietan egin duten lana txalotu du Marotiasek. «Sasoia mantentzeko euren etxeetan egin duten esfortzua ikaragarria izan da; meritua dute». Batak zein besteak «saritzat» hartu dute norgehiagoka jokatzea.

Baina denek ez dute liga hasi aurreko lagunarteko neurketa jokatzeko aukerarik izan. Ez, behintzat, Eibarrek. Ourdik ez du ezkutatu lehiatzeko falta handia sumatzen dutela. «Lan saioetan egiten ditugun neurketetan taldekideen aurka ez ditugu plakaketak egiten, eta jokoaren erritmoa ere motelagoa da». Hala, liga hasi baino lehen partidaren bat jokatzea beharrezkotzat jotzen du, «dena emateko», maila nagusian estreinakoz ariko baitira.

Hain zuzen, gizonezkoen liga urriaren 24an hasiko da, eta, iaz bezala, bi euskal talde arituko dira gorengo mailan. Aurtengoan, ordea, Ampo Ordiziaz gain, Getxok hartuko du Hernaniren lekua, igotzea lortu baitu. Calvok eta haren taldekideek zuhurtziaz ekingo diote txapelketari. «Badakigu lan handia egin beharko dugula aurkariei gauzak zail jartzeko».

Atzo jakin zuten noren aurka jokatuko duten lehen jardunaldian. Ordiziarrek Independienteren kontra jokatuko dute. «Denboraldi oro aldaketa asko egiten dituen talde bat da, eta beti kanporaketak jokatzeko borrokan egoten da». Getxoztarrek, berriz, Alcobendasen aurka neurtuko dituzte indarrak: «Txapelketak irabazteko lehian egongo da. Baina ondo etorriko zaigu halako aukari gogor baten aurka hastea. Dena eman beharko dugu».

Osasun krisiaren eraginez, ligako formatuan aldaketak egon dira; besteak beste, lehen itzulia soilik egingo dute: gizonezkoetan hamaika neurketa. Neurketa horiek jokatutakoan, bi multzotan banatuko dituzte taldeak; lehen seiak titulurako lehiatuko dira; besteak, aldiz, jaitsierako postuak saihesteko. Marotiasek azaldu duenez, ohiko formatuan egiteko modurik ez zegoen, neurketa batetik bestera atsedena hartu behar baitzuten. Bestalde, segurtasun neurri zorrotzak ezarrita ere, Calvok irudipena du kutsatze kasuak jazoko direla: «Eguneroko kontua izango da, baina egoera berrira egokitu beharko dugu. Ez dago besterik».

Emakumezkoen maila nagusiak ere formatu bera izango du: zazpi partida jokatuko dituzte hasieran. Halere, liga hasteko eguna dezente urrutiago dute : abenduaren 12a. Maila gorenean zortzi talde izanda, «moldagarriagoa» izango dela uste du Ourdik. Alabaina, berdintasunik eza errugbian ere islatzen dela nabarmendu du: «Emakumeen talde gehiago sortu behar dira, geuk ere ikusgarritasun handiagoa izateko». Gipuzkoarrek ez dakite oraindik zein talde izango duten aurrean lehen jardunaldian. Ez du ukatu horrek, zalantzarik gabe, «ezinegona» eragiten diela.

Estreinaldiko aurreneko neurketa ortzi mugan ikusten duten arren, ilusiorik ez zaie falta, eta jokatzeko amorratzen daude. «Gogor ari gara entrenatzen, eta lehen jardunaldian zeintzuk garen argi geratuko dela uste dut». Taldearen iazko bizkarrezurra galdu gabe, atzerrian ibili diren pare bat jokalari Eibarren proiektura batu dira; aipagarriena, Iera Echebarria madrildarra, eskarmentu handikoa. «Talde igo berria garen arren gauzak ondo egiten ari garen seinale izango da», aitortu du.

Ampo Ordiziak eta Getxok «nolabait» eutsi diote azken lau urteetako taldeari, betiere etxeko jokalariak taldearen oinarri direla ahaztu gabe. Bietan, taldeko jokalarien %80 inguru harrobikoak dira, eta Ordizian bederatzi profesional dituzte; Getxon, berriz, bost. Fitxaketa gutxi egiteak badu bere alde ona, Calvoren iritziz: «Taldea kanpoko jokalari gutxirekin indartzen baduzu, egitura oso gutxi aldatzen da; hala, kanpoko jokalariek taldera egokitu behar dute, eta ez alderantziz».

Talde bat, helburu bana

Bakoitzak dituen dohainen eta kalitatearen arabera, helburu ezberdinekin ekingo diote denboraldiari. Eibarren eta Getxoren kasuan, bigarren mailatik lehen mailara igota, Ourdik eta Calvok badakite exijentzia handiagoa izango dela. Gipuzkoarrak motibazioz gainezka dira: «Maila mantentzeaz gain, lehiakorrak izan eta Eibar mapan jarri nahi dugu, umiltasuna eta anbizioa galdu gabe». Calvok ez du kerik saldu nahi. «Datorren urtean maila nagusian egoteko langileak eta borrokalariak izan behar gara».

Ampo Ordiziakoak, bestalde aurreko denboraldian geratu zitzaien arantza kendu, eta urrats bat aurrera egin nahi dute. «Titulurako lehian ibili nahi dugu», esan du Marotiasek. Gustuko dute baloia abiadura eta intentsitate handiarekin mugitzea, eta defentsa arloan ere «indartsu» sentitzen dira: «Ordiziako jarraitzaileei horixe gustatzen zaie». Horrenbestez, gero eta gertuago dago hasiera.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©JAGOBA MANTEROLA / FOKU

«Gozatzen dudalako jokatu izan dut beti, ez markak ezartzeko»

Beñat Mujika Telleria

Maria Españak urte asko daramatza Espainiako ligarik onenetan aritzen, eta kirol heldutasun betean dago. Bikain ari da denboraldi honetan. Kantxan erakusten duen lidergo bera erakusten du handik kanpo ere.
Iñaki Williams baloiarekin, denboraldi honetan San Mamesen Atletico Madrilen aurka jokatutako partidan. ©ARITZ LOIOLA / FOKU

Hutsune handia utzi du Williamsek

Haritz Gallastegi

Iñaki Williamsek marka ezarri du ligan: 251 partida jokatu ditu. Zelaian ari denean kritikatu egiten dute; ez dagoenean, aldiz, sumatu egiten da haren falta.

Eibarrek eta Alavesek lehen itzulian Ipuruan jokatutako derbiaren jokaldi bat. ©JAIZKI FONTANEDA / FOKU

Biak gora begira daude

Iñigo Lasa Fresneda

Alavesek eta Eibarrek sasoi onean jokatuko dute derbia larunbatean, Mendizorrotzan; bi taldeak goiko postuetan daude. Txema Añibarrok argi du: «Intentsitate eta parekotasun handiko partida izango da».

Osasunaren jarraitzaileak Sevillaren aurkako Kopako partidan. ©Jesús Diges, Efe

Indar Gorriko sei kide atxilotu dituzte Iruñean, borrokaldi batean parte hartu izana egotzita

Berria

Espainiako Poliziak 64 lagun atxilotu ditu guztira, azaroaren 27an Burgos eta Zaragoza taldeen arteko partidaren aurretik Burgosko El Plantio zelaiaren inguruan izandako borrokaldian parte hartzea leporatuta. Tartean daude Indar Gorriko sei jarraitzaile horiek.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.